Goal khung thiam Man United
Manchester United manager Jose Mourinho chuan CSKA Moscow 4-1 zeta an hneh hnuah Champions League knock out round an hnaih tawh thu a sawi chhuak. Group A inkhel dangah Basel chuan an mikhual Benfica chu 5-0 ngawtin an sawp ve bawk.
Nilaini zan khan Russia-ah United an zin chhuak a, Romelu Lukaku-a'n goal hnih khungin Anthony Martial chuan penalty a chhuih luh bakah Henrikh Mkhitaryan-a'n an goal lina a khung bawk - kum 2013 November thla hnua a vawi khat nan Champions League inelna huangah bik United hian khualmualah hnehna an chang leh chiah.
United manager Mourinho chuan, "A pawimawh lai chu match hnih khelh aṭanga point ruk hmuh hi a ni, inkhelh hmabak pali a la awm nachungin round sang zawk lut turin kan dinhmun kan siamṭha tawh," tiin a sawi.
Nipui laia Everton a-
ṭanga Old Trafford pantu Lukaku-a'n a club thar tan inelna hrang hrangah match kua a khelh aṭangin goal 10 a khung leh der tawh, manager Mourinho chuan, "Goal khung thei bik tak a nihzia hi chu kan hre sa a, player ṭha tak tak bula a khelh chuan a hna a awlsam phah a ni," tiin Lukaku chetṭhat chhan chu a ṭhiante puihna a dawn ṭhat vang a nih thu a sawi bawk.
Inkhelh harsatna hmun Russia chungchang sawi zuiin Mourinho chuan, "He hmuna ka team hruai tawh zingah chuan a ṭha ber an la ni. Chelsea, Inter Milan leh Real Madrid ka enkawl laiin Rusisa-ah kan inkhel tawh a, ka hmuh dan chuan tun ṭum hi kan khelh ṭhat ber a la ni hial," tiin a sawi.
Chelsea manager hlui Mourinho-a'n season hmasa khan Premier League-ah a nuate thlensanpui thei lo mah se Europa League champion an ni a, hmasawn a tum avangin nipui bazarah a mamawh ang player a lalut bawk.
Russia-ah hian player langsar ṭhenkhat Antonio Valencia, Phil Jones, Marcos Rojo, Paul Pogba, Marouane Fellaini, Michael Carrick leh Zlatan Ibrahimovic te tel lo pawhin harsa lo takin hnehna an chang thei a, season hmasa ai chuan an squad a chhahin hma an sawn tih a chiang.
Manchester United hi Premier League lamaha pawh an khelh ṭha tluang hle, match rukah hneh loh an la tawng lo. Inrinni zan dar 7:30-ah table mawngphah a awm Crystal Palace an mikhual leh dawn a, hna harsa a ni lo tura ngaih a ni. Jose Mourinho kaihhruai United hi tun dinhmunah chuan an kal filawr hle, amaherawhchu chetsual theihna tur khawpa club lian an la hmachhawn miau loh avangin engtiang taka ṭha nge an nih tih hi sawi theih a la ni lo.