Chhinga Veng tan chetsual theihna

Lalsangzuala Hmar kaih­hruaina hnuaiah Chhinga Veng FC-in match 17 chhung hneh loh an tawng tawh lo. Amaherawhchu Chhingcows hian vawiin tlai dar 3:00-a an hmachhawn tur Ramhlun North lakah record an nei ṭha lo.

Mizoram Premier League Season 6 hmahruaitu Chhinga Veng FC tan vawiin hi chetsual theihna a ni. Ramhlun North hian Aizawl DFA hnuaia first division club an nih laiin Chhingcows hi vawi khat hnehin vawi khat an draw a, MPL5 Qualifier-ah pakhatna dinhmun hauh turin Chhinga Veng hi an hneh bawk.

Season liam ta khan Ramhlun North-in Champhaiah Chhinga Veng hi 3-2 in a hneh a, Lam­mualah an draw leh bawk. Tun season-a team ṭihbaiawm bera ngaih Chhinga Veng hi record thlir chuan Ramhlun North tan tum châkawm an ni thung a, Samson Ramengmawia kaihhruai team hian match thum chhung an chak loh hnuah point hmuh an inbeisei thei ang.

Amaherawhchu tun din­hmuna an khelh dan aṭanga thlir chuan Chhinga Veng chu chak tura rinawm zawk an ni. Chhingcows coach Sanga chuan, "Ramhlun North hi team ṭha tak an ni a, kan record thlir pawhin han zuam tur kan ni lo. Chutihrualin record tihtawp duh luat vanga player-te chunga pressure pek vak ka tum lo. Theihtawp kan chhuah ang a, point thum hmuh hi kan duh a, chu­mi paha anni laka kan record ṭha lo kan tih tawp theih chuan kan lawmna a belhchhah ang," tiin pressure hranpa insiam belh a tum lo.

Chhinga Veng hian hma­hruaitu dinhmun sawhnghet turin anmahni hnaih bertu Chanmari FC an hneh a, tun round-ah pawh point hmu lo se a chung berah an awm chhunzawm tho ang. Chutihrualin Chhingcows centre midfielder zingah R. Malsawmtluanga chiah dam ṭha famkim a awm a, Ramhlun North tan thu lawmawm tling pha mah se tlarhmaa tlan tur Malsawmfela, Laldampuia, MS Dawngliana leh Lalkhawpuimawia te an dam vek avangin ngaih ṭha taka awm theih tur erawh a ni lo.

Ramhlun North coach Sam­son-a chuan, "Result neih ṭhat loh lai ni mah se Chhinga Veng laka kan record hian minti phur a, anni lam tan pressure a siam thiam thei bawk ang. Vawi thum kan chak lo zawn tawh a, point hmuh ngei tumin theihtawp kan chhuah dawn," tiin Vanglaini a hrilh.

Samson-a hian player pawi­mawh pahnih Lalliansanga (Notea) leh V. Lalchhuanawma te inhliam vangin a la chhawr thei dawn lo a, match dang zawng aiin veng mipui puihna an mamawh ang.