Paris-ah Bayern Munich an mualpho

Dani Alves, Edinson Cavani leh Neymar te goal hmangin Paris St-Germain chuan an mikhual Bayern Munich 3-0 in an sawp a, Unai Emery naute hian point ruk hmuin Champions League Group B hmahruaitu an ni - inkhel dangah Celtic chuan Anderlecht chu si thum fai thoin an hneh ve bawk.

Parc des Princes, Paris-a inkhelah Neymar-a'n chak taka ball a tlan luhpui hnuah Brazil tana a khelhpui Alves tan a siamsak a, Barcelona defender hlui hian chiang zetin a khung. PSG keeper Alphonse Areola-a'n Bayern defender Javi Martinez-a goal khung tur ropui takin a dan sak a, Paris club an him hlauh.

France rawlthar duhawm Kylian Mbappe thawhrah sengin striker Cavani chuan box pawn aṭangin an goal hnihna a thlawh lut a, chawlhlak hmain Carlo Ancelotti-a'n a club hlui PSG lakah si hnih fai a phur der tawh.

Second half-ah pawh boruak a danglam tam lo, goal mamawh Bayern an hriam tawk lo a, mualneitu lamin an goal an venhim bakah counter attack aṭangin na takin an khingpui an nawr let fo. Pound makatduai 200 man Neymar-a'n buai nuaih karah an goal thumna a khung, he goal-ah hian Mbappe a inrawlh leh tho bawk.

Rinkai PSG

Season hmasa khan PSG hi Barcelona khelmual Nou Camp-ah 6-1 in an tlawm a, Catalan club an hneh loh ṭuma player paruk ngawt khan Bayern an hmachhawn leh. Barca tan player pawimawh ni ṭhin Neymar-a'n PSG jersey a ha tawh, Ligue 1-a Monaco champion puitu Mbappe an neih belh bawk.

Penalty leh freekick pet chung­changa buaina nei Neymar leh Cavani ten an goal khung an inlawmpui thei a, player tawnhriat ngah pahnihte tha ti chak turin khawvel rawlthar beiseiawm ber pakhat Mbappe a awm bawk avangin season dang zawng aiin Champions League beiseina an nei sang zawk a nih pawhin a mak lo ang.

PSG manager Unai Emery chuan, "Table hmahruaitu nih kan duh a, kan mamawh point thum kan hmuh theih avangin a lawmawm hle. Club ṭha leh hriam tak Bayern Munich kan hneh theih theih avangin inrintawkna kan neih belh dawn a ni," tiin a sawi. PSG hian an match lehpekah chuan Belgian club Anderlecht an lenchilh ang.

Bayern an chuai?

German champion Bayern Mu­nich hian an match hmasa zawkah Anderlecht hneh mah se Paris club lakah an vannei tawk lo. Goal shot vawi 16 neiin corner pawh ṭum 18 zet an pet bawk - an vanneih ṭum nise chuan goal khung thei dinhmunah an ding.

Goalkeeper Manuel Neuer in­lan theih loh vanga Bayern si ban nghaktu Sven Ulreich-a'n Wolfsburg lakah a tihsual thawidamna hun ṭha nei mah se dan theih tura ngaih Alves leh Neymar te hmaah a hna a tlin tawk lo.

Italian manager Ancelotti-a'n senior player Arjen Robben, Mats Hummels leh Franck Ribery te bench-ah a dah a, Javi Martinez leh Niklas Sule te chu tlarhnung laiah inkawptirin Real Madrid aṭang an lakluh James Rodriguez chu tlarhma pui tura dah a ni bawk, an chak lo tak hnuah Bayern manager hian a player thlan dan chungchangah sawisel a tawk.

Bayern Munich manager Carlo Ancelotti chuan, "Sawiselna ka tawk dawn tih hi chu ka hre lawk a, chutih rualin tun ṭuma kan match atan bik chuan kan ṭhatdan berin kan inrem a ni. Kan team balance a ṭha tawk lo a, anni khan counter attack aṭanga min nawr an thiam hle thung," tiin a sawi.