Atletico ngamtu Premier League champion

Premier League champion Chelsea chuan Nilaini zan khan khualmualah Atletico Madrid an lenchilh a, hun pek belha Michy Batshuayi goal khung hmangin Spanish club hi an hneh - Atletico tan an khelmuala Europe-a match 11 chhung tlawm hmel an hmuh loh hnua an tlawmna hmasa ber a ni.

Group C inkhel dangah AS Roma chuan 2-1 in FK Qarabag an hneh ve bawk avangin Chelsea chu hmahruaitu an ni a, vawi hnih inkhela point khat chiah la hmu Atletico hi pathumnaah an awm - vawi hnih khelha point khat chiah la neih hi season hnuhnung palia Champions League final vawi hnih lut thei Atletico tan result duhawm a ni mawlh lo.

Batshuayi 'Batman'

Blues-in minute 40-na lekah David Luiz-a'n ṭul lo taka Lucas Hernandez a pawh avangin penalty an chawi a, Atletico tan Antoine Griezmann chuan goal-ah a chantir. Mahse, inkhel ṭantir lama Eden Hazard hmanga post pet pertu Chelsea an beidawng duh lo a, minute 59-naah Alvaro Morata chuan an si phurh a sut.

Cesc Fabregas leh Morata ten English champion tana chance duhawm an hlauh zui hnuah Batshuayi a inlar a, 'Batman' tia hminglem an pek Belgian striker hian mamawh hunah a team tan chhandamtu a ni tih pholangin chakna goal a khung - hun pek belh minute lina a ni tawh a, Atletico tan thawhlehna hun a awm tawh lo.

Morata & Hazard

Chelsea tan tun season-a a vawi hnih nan Eden Hazard chuan inkhel bul a ṭan a, Blues fan-te tana lawmna tur chu Belgian winger hi Morata nen an vawi khat inkhelh bul ṭannaah an inthlawp ṭha hle - Spanish striker Morata hian goal zawnah vawi ruk ngawt shot a nei a, Hazard-a'n vawi li a nei thei thung. Morata goal khung tura Hazard ball siamsak hi duhthusam a ni. Madrid khawpuia a kirna inkhelah Morata-a'n auh el tawk nasa mah se a club thar tan match kua a khelha a goal riat khungna turah harsatna a tawk lo.