Number 1 Muguruza a chak zel

Nilaini zan khan world number 1 Garbine Muguruza chuan Magda Linette hnehin Wuhan Open quarterfinal a lut. Inkhel dangah rinkai zinga tel phak Agnieszka Radwanska a chak lo thung.

China-a inkhelah Spain nula Muguruza-i'n set hmasa berah a service aṭanga point thum chiah hloh chungin set a la a, set hnihnaah erawh game khat bak a la thei lo, inkhel inhnehtawk takah 6-2, 1-6, 6-4 in a chak zawk. French Open champion Jelena Ostapenko nen an inkhel leh ang.

Kum 23 mi Muguruza chuan, "Set hnihna kan khelh lai kha chuan rilru a buai ve duh hman hle, ka hnufual hnuah pawh ka chiai duh bik lo. Tun ṭum ka match aṭang hian break point vawi khat hlutzia ka zir chhuak thar a ni," tiin a sawi. Muguruza hian hnehna chang turin set hnu­hnung berah a khingpui service vawi khat a chhuhsak a ni.

Last 16 inkhel pakhat zawkah seeded pakuana Agnieszka Radwanska chu Ashleigh Bart nen darkar khat leh minute 57 zet an inkhelh hnuah 4-6, 6-0, 6-4 in a chak lo zawkah a ṭang.

Kum 28 mi Radwanska hi season hmasa ṭan dawn kha chuan world number 3 a ni a, beisei ang result a neih theih tak loh avangin tunah hian num­ber 13-naah a tlahniam tawh.