SAFF-ah India an thamral

SAFF Under 18 Cham­pionship 2017-ah India-in champion beiseina nen bul ṭan mah se pathumna nichungin tournament an khar a, an match hnuhnung berah Nepal chu 2-0 in an ngam lo.

Bhutan-a khelh SAFF U18-ah hian Bangladesh, Bhutan, India, Maldives leh Nepal te an inkhel kual a, a tawpa point hmu sang ber Bangladesh an champion. Nilainia match hnuhnung ber khelh ni thleng hian India hian champion beiseina an nei a, Bhutan nena inkhel Bangladesh an tlawm a, annin Nepal an hneh chuan an champion thei.

Mahse, India inkhelh hmain Bangladesh-in 3-0 ngawtin Bhutan an sawp a, head-to-head points en a nih avangin an match hmasa bera Bangladesh ngam lotu India tan champion beiseina a bo tawh - India-in Nepal an ngam lo zui a, Dinesh Henjan chuan goal hnih a khung.

SAFF U18-ah hian Mi­zo rawlthar Lalawmpuia chuan India tan match li khelhah goal thum ngawt a khung a, goal khung tam lamah Bangladesh tana goal nga khungtu Jafar Iqbal chiah a tluk lo.

Nepal hmachhawntu India squad:

Aditya Patra (GK) (Mohd Haroon 68’), Deepak Tangri, Sahil Panwar (C), Abhisek Halder, Namgyal Bhutia, Edmund Lalrindika, Lalawmpuia, Zonunmawia, Pranjal Bhumij, Princeton Rebello, Ashish Rai