AFC Cup Khualmualah Bengaluru an tlawm
Bengaluru FC chuan Nilaini zan khan AFC Cup Inter Zone final-ah FC Istiklol chu 1-0 in an ngam lo a, October 18-a second leg an khelh hunah Bangalore club tan si hnih fai tala hnehna chan a ṭul dawn tihna a ni.
AFC Cup hi tun season-ah a khelh dan phung an thlak a, Inter Zone final hi season hmasaa semifinal tlukpui kha a ni. Chumi awmzia chu he inkhel pahnih belhkhawma chak zawk zawk hian AFC Cup final an lut dawn tihna a ni a, Bengaluru hian second leg-ah Tajikistan club hi an lehthal thei a nih chuan Indian club zinga AFC Cup final lut hmasa ber an nih hnuah a zawna lut thei hmasa ber an ni leh dawn tihna a ni.
Inkhel chu
Bengaluru boss Albert Roca-a'n 4-3-3 formation a hmang a, mualneitu lamin 4-2-2 formation an hmang thung. Bangalore club-in player langsarah defender John Johnson chu chhungkaw buaina avangin a chhawr thei lo a, Istikol lamin defender Artem Baranovskyi leh midfielder pahnih David Mawutor leh Amirbek Juraboev-te chu hrem vangin an chhawr thei lo bawk.
Inkhel ṭantir lamah mualneitu club lam thinphu a rang a, Udanta Singh-a'n hun ṭha a nei nghal. Mahse, Tajak champion an harh thuai a, Bengaluru goalkeeper Gurpreet Singh Sandhu-a'n save ṭha zet a neih chhunzawm - minute 27-naah erawh Bengaluru an ṭang zo lo. Fatkhuloev-a pass mawi zet chu Russian forward Dmitry Barkov-a'n a tauh lut a, Udanta leh Sunil Chhetri ten Indian club tan hun ṭha nei ve mah se eng ualah an chantir thei lo a, Bangalore club an tlawm.
Khawiah nge Mizo?
Tajikistan-ah Bangalore club-a awm Mizo pali Daniel Lalhlimpuia, Malsawmzuala, Lalthuammawia Ralte leh Zohmingliana Ralte te an zin vek a, inkhel bul ṭan phak erawh an awm lo - Albert Rocoa enkawlna hnuaiah Mizoin hmun pawimawh an chang phak lo.
Sawmtea, Thuama leh Zotea ten bench lamah hun an hman tluan laiin Daniel-a chu minute 77-naah tlan luhtir a ni a, Serchhip rawlthar hian Spanish striker Toni Dovale a thlak. Mahse, goal khung tura tlan luhtir Mizo rawlthar hian Bengaluru tlawm tur a chhan thei bik lo a, hun tawp hnaih lama a hun ṭha neih chu goal-ah a chantir thei lo.
Inkhel Thlirna
Inkhel pumpui thlirin Bengaluru chungnung zawk mah se chance mumal an insiam hleithei lo a, goal hmaah an hriam tawk lo bawk - an result-ah chu chu a lang. Bangalore club hian goal-ah shot vawi thum chauh an nei thei a, target-ah vawi thum an pet. Attacking game khel sia an shot neih zat chhutin Albert Roca tan ngaihtuahna thar sen a ṭul ang.
Bengaluru-in ball an chang tam zawk a, ball possession 64.8% neiin Istikol ball chan zat chu 35.2% a ni thung. Mahse, Tajak League champion-in ball an chan tlem aiin shot an ngah a, vawi 11 zet shot neiin vawi thum goal zawnah an pet. Bengaluru-in vawi 306 ball an in pass aṭanga 251 an in pass dik theih laiin Istikol-in vawi 160 chiah ball an inpe kual thei a, vawi 120 an pass dik.