India rama a vawi khatna tur Kum 6-12 tan football league

Mizoram Football Asso­ciation leh 8one Foun­dation te chuan, nimin khan kum 6-12 inkar naupang tan football league an buatsaih tur thu Regency Hotel, Aizawlah an puang. Inelna hming hi Young Legends' League (YLL) tih a ni ang a, Champhaiah neih tur niin India rama a vawi khatna tur a ni.

Mizorama football thuneitu sang ber MFA leh 8one Foun­dation chuan kum 10 chhung atan MoU an ziak a, pawl pahnih hian inremna angin Young Legends' League chu kum 2027 thleng an buatsaih ang.

MFA honorary secretary Lal­nghinglova Hmar chuan, "Kum 12 hnuai lam player-in inelna an hmachhawn dawn a, hetah hian nasa takin an thiamna an tipung thei ang. MFA chuan naupang ten an thiamna phochhuah theihna tur a awm tur hi lawmawm kan ti hle," tiin a sawi.

Inelna kalphung

Naupang inelna hi ruahman dan chuan age group pathum Under 8, Under 10 leh Under 12 ah ṭhenhran tur a ni.

Inelna hi 5 vs 5 (Five a side) a kalpui a ni ang a, age group khatah team 12 zel awmin team khatah player pasarih zel an awm ang.

Inelna hi league a kalpui a ni ang a, vawi thum ṭheuh an inkhel kual ang. Team pakhatin match 33 zel an nei ang a, league pumpuiah match 594 a awm ang.

League rei zawng hi thla riat a ni ang a, kar tin Inrinni apianga neih ṭhin tura ruahman phawt a ni.

Tih dan ṭha entawn

Khawvel huapa football thiam ram te chuan naupan lai aṭangin football an khel ṭhin a, kum 13 an tlin chuan professional football kalphung an hre tawh ṭhin.

Barcelona star Lionel Messi chuan kum 4 leka upa a nihin Argentina-a club pakhat Grandoli tan a khel tawh a, hemi hnu hian Argentine club lar Newell's Old Boys tan khel lehin kum 13 mi nia Barcelona a zawm meuh chuan goal 500 chuang a khung tawh.

Cristiano Ronaldo-a'n kum sarih leka upa a nihin Portugal club Andorinha tan a khel tawh a, Sweden-a Zlatan Ibrahimovic-a'n kum ruk mi a nihin Sweden club Malmo-ah a inzir ṭan tawh bawk.

Engtin zel?

YLL hi November thla

aṭanga neih ṭan tum a ni a, Mizo­ram tana thil thar hi India ram pawhin a la hmelhriat chuang lo.

8 One dintu Varun Achreja chuan, "India ram football-in hma a sawn theih nan kalphung thlak a ṭul a, tun hnaiah Mizo­ramin nasa taka hma a sawn avang leh theihna sang tak a neih avangin ngaihtuah buai ngai loin Mizoram kan thlang a ni," tiin a sawi a, MFA aṭanga thlawpna

ṭha tak an hmu chu lawmawm a tih thu a sawi bawk.

Varun chuan, "Naupangte hi an lehkhazirna hlamchhiah kan phal dawn lo a, an nu leh pa te kaltlangin taksa enkawl dan tur zirtir an ni ang a. An kal zelna tur kan ngaihtuah pui bawk ang," a ti.

8One Foundation hian sum leh pai an thawh dawn a, chung zingah chuan naupang infiamna thawmhnaw bakah inkhel buatsaihna man a tel ang.

Champhai an lawm

Champhai DFA senior vice president IC Hranglura (Valtea) chuan, "Mizoram mai ni lo India ram tan pawh rohlu tling phak Champhaiin kan thleng thei hi vanneihthlak kan ti a. MFA hruaitu Leh 8One Foundation hotute chungah CDFA te kan lawm takzet a ni," tiin Vanglaini a hrilh.

Valtea chuan, "CDFA chuan a hmasa ber ni ringawt loin entawntlak khawpa changtlung leh ṭhaa tih tum dawn. Champhai mipui tan chanchin ṭha a ni a, nu leh pa pawhin min phur pui hle," tiin an inpeih tawh thu a sawi ve bawk.

Champhai District hi India huap pawha player lar Lalthuammawia Ralte, Lalchhawnkima, Lalruatthara, R Laldanmawia leh Robert Lalthlamuana te chawr chhuahna a ni.

Footballer thukhawchang

Mizo football legend S. Mal­sawmtluanga chuan, "Kum naupang te aṭanga football an khel ṭan tur hi an vannei kan ti a, kawng zau zawk a inhawn phah ang. Hmalatu MFA leh 8One te an fakawm," tiin a sawi.

India International striker Jeje Lalpekhlua chuan, "Mizoram football chanchinah chuan ngaihthlak nuam ber zinga mi a ni. Kei chuan ka naupan lai aṭanga inzirna hun ṭha ka nei thei lo a, tuna naupangte hian an hun ṭha neih hi an hmang ṭangkai chuan Indian football-ah hmabak eng tak an nei a ni," tiin a sawi.

Young Legends League kalpui tur hian MFA, 8One Foundation, Football Solutions, NorthEast United, The Rasich Group leh Zonet te chu an thawk ho dawn a ni.