Bayern Munich-in Ancelotti an ban

German champion Bayern Munich chuan an manager ṭang lai Carlo Ancelotti chu a hna aṭangin an ban. Assistant manager nilai Willy Sagnol chuan Ancelotti hmunruak hi a hnawh khat rih ang.

Italian manager An­celotti hian season hmasa ṭan dawn khan Pep Guar­diola chhuahsan Bayern a enkawl ṭan a, a season hmasa berah hian Bundesliga champion an ni. Mahse, Champions League-ah quarterfinal an tlang phak lo a, German Cup-ah pawh semifinal an pel lo.

A zawna vawi nga Bundesliga champion ni thei Bayern hian season bul an ṭan fuh tawk lo a, league lamah an elpui Borussia Dortmund aiin point thumin an hniam zawk. An ropuina ṭhin European football-ah pawh beisei an phak lo, Nilaini zan khan Paris St-Germain khelmualah 3-0 in an tlawm a, an result ṭha lo hi manager-in a tuar ta a ni.

Bayern Munich chief executive Karl-Heinz Rummenigge chuan, "Sea­son tir aṭang khan Bayern khelh dan hian kan beisei a la phal lo, Paris-a kan chak loh dan en khan insawi danglam kan mamawh a ni," tiin an manager an ban chhan a sawi.

Rummenigge chuan sawi zawmin, "Carlo hi ka ṭhian ṭha tak a ni a, a ni reng bawk ang. Kan club tana a hnathawh avangin a chungah lawmthu ka sawi a, a kal lehzelna turah duhsakna ka hlan," a ti. Rummenigge hian hmasawn an duh thu leh an beisei anga team ṭha an din theih a beisei thu a sawi tel bawk.

Kum 58 mi Ancelotti hian tun hmain Chelsea, PSG, Real Madrid leh AC Milan te a enkawl tawh a, Milan leh Real tan hian Champions League nomawi a chawi. Bayern Munich-ah pawh a season khatnaah hna a thawk chhe hran lo, mah se manager a thlak tak Guardiola nen an kalphung a in ang lo a, club thuneitu lam nen pawh an thu a inhmu lo zeuh zeuh fo.

Bayern hi team ngel­nghet tak an nih avangin manager thar ṭha tak an hmu leh maiin a rinawm a, chutihrualin Ancelotti anga sulhnu nei ṭha thur­chhuah nalh tur erawh an vang rih ang.

Bundesliga pathumna nilai Bayern Munich hian Pathianni zan dar 7:00-ah Hertha an lenchilh dawn a, manager lailawk Sagnol tan hna hmasa ber a inṭan nghal dawn a ni.