Chhinga Veng = Ramhlun North

Lammuala Ramhlun North au hla chu 'Chhinga Vengin min hneh thei lo' tih a ni a, thudik a nih miau avangin Chhingcows lam tan chhanlet ngaihna a awm lo!

Nimin tlai Mizoram Premier League Season 6 inkhel boruak sang takah Ramhlun North leh Chhinga Veng 3-3 in an inhnehtawk.

Lalsangzuala Hmar hote match 18 chhung hneh lo nei loin kaltluang tawh mah se first division hunlai aṭanga an hneh theih loh Ramhlun North lakah chak hmel an la hmuh chuang loh avangin an lawm lo ang - hun tawp dawna an sût erawh an lawm ang.

Goal ruk

Ramhlun North forward Lalrem­ruata'n minute thumna lekah Lalram­zauva Khiangte corner pet a tauh goal nghal. Minute 20 em pawh a ral hmain Lalkhawpuimawia leh Laldampuia te goal hmangin Chhinga Vengin an lehthal.

League hmahruaitu Chhinga Veng khelh fuh ṭum a ni lo a, goal hmaah an hriam lo. Ramhlun North player-te'n chak châkna an ngah zawk a, keeper-in a chhuah hnuah Chhinga Veng captain Lalrinchhana Tochhawng leh midfielder Lalrinchhana ten goal line aṭangin ṭum khat ve ve an dang.

Minute 80-naah V. Lalchhuan­awma luhtir a ni a, chak tawha inngai Chhingcows dinhmun thlakin a awm.

Chhinga Veng midfielder Rinchhana handball vanga penalty chawi chu Chhuantea hian minute 83-naah goal-ah a chantir. Minute 89-naah Ramhlun North tlangval Chhuantea hian penalty aṭang bawkin a khung leh bawk. Penalty vawi hnihna hi Zothanmawia'n ball a man hnuah Ramhlun North winger Lalrinfela chu ṭul lo takin a khupin a do tlu a, Chhingcows keeper T. Mawia hian penalty chazwi mah se, red card a pumpelh hi a vannei.

Ramhlun North tan point thum hlawhchhuah harsa tawh lo mah se concentration an hloh avangin Chhinga Veng captain Lalrinchhana Tochhawng-in injury time-ah si phurh sutna goal a khung.

Record a kal zel

Chhinga Vengin ṭum dang an pha lo a, minute 90 a zawhah chuan team vannei zawk an ni. Penalty an chawi hnuah captain Rinchhana'n nasa takin referee thutlukna a sawisel a, red card a pumpelh zarah siphurh sutna goal a khung theih phah.

Ramhlun North-in Chhingcows laka an record ṭha chhawm nung zel mah se injury time-ah concentration an hloh a, point thum hmuh tum tawhin point khat chiah an hmuh avangin lawmna famkim an chang pha lo.