Lukaku chungah Mourinho a lawm

Manchester United manager Jose Mourinho chuan a striker Ro­melu Lukaku chuan a beisei phak baka a khelh ṭhat ṭhin thu a sawi.

Nipui transfer laia pound maktaduai 75-a Everton aṭanga United pantu striker hian Red Devils tan inelna hrang hrangah match kua khelin goal 10 a khung tling der tawh a, Old Trafford a pan tirha a manto thu tlangaupui tu te pawh tunah chuan an ngawi rih.

Portuguese manager chuan, "Match zawng zawng deuh­thawah hian goal pawimawh a khung reng mai tih hi thup bo theih chi pawh a ni lo," a ti a, a striker chu goal khung thei a nihna piah lamah boruak sang pawh zo tak niin a sawi.

Premier League-ah forward ṭha an tam a, tun dinhmunah Lukaku bakah Manchester City striker Sergio Aguero leh Chelsea striker Alvaro Morata te chuan goal ruk ṭheuh khung tawhin top scorer an ni mek.

Goal nga khung tawhtu City forward Raheem Sterling leh Leicester City striker Jamie Vardy, City striker Gabriel Jesus (4), Tottenham Hotspur forward Harry Kane (4) leh Arsenal player manto ber Alexandre Laca­zette (4) te pawh top scorer inelnaah ngaihthah an thiang lo.

Mahse, Lukaku chuan mi­mal chawimawina aia team hlawh­tlinna a ngaihpawimawh thu sawiin, "Nomawi chawi ka duh ber a, a bak duh ka nei lo," a ti. United hian zanin dar 7:30-ah Premier League khel turin Crystal Palace an lo mikhual ang.