BS-a hoin Police chak nghal

Mizoram Police-in coach thar Lalbiaksanga Colney hnuaia an match hmasa berah Chanmari West 2-1 in an hneh a, Mizoram Premier League Season 6-a an vawi khat chakna a ni.

September 28, Ningani zanah Lalfakzuala'n minute 23-naah Police hmahruaina goal a khung a, minute khat pawh a ral hmain Chanmari West-in midfielder Jacob Lalrawngbawla hmangin sut mah se hun tawp hma minute nga a la awm tihin Police forward F. Lalrinpuia'n chakna goal a khung.

BS-a kut chhuak

Mizoram Police-in match nga an khelh aṭangin point khat chauh an hmu a, hemi hmaa inelna I Day Football-ah first round aṭanga an tlak bawk avangin inringtawkna an hloh nasa hle.

Coach thar BS-a Colney tana harsatna belhchhah turin kumin MFA Super Cup-a best goalkeeper Lalṭanpuia bakah Santosh Trophy-a Mizoram tana khel pha defender Lal­hmun­mawia leh midfielder Lalramtharmawia te chu inhliam vangin chhawr theih an ni lo.

Armed Veng pa BS-a'n hun harsaah a tawnhriat neih ṭhat hmang ṭangkaiin CYMA Foot­ball-a an veng a champion pui theih nana a player pawimawh B. Zoramthanga (B. Sena) leh Simon Lalruatkima te chu tlarhnung pawp hnawh phui nan a hmang.

Season liam taa Bethlehem Vengthlang final thlenpuitu BS-a hian tlarhmaah a player neih ṭhat a luttir nghal vek bawk.

Phurna leh vanneihna

Mizoram Police-in coach thar hnuaiah ṭum dang zawng aiin an khel ṭha a, halfway line bula an freekick hmuh chu minute 23-naah B. Sena'n vawrh lutin Armed Veng tlangval Fakzuala'n nalh zetin a tauh lut.

West Warrior-in an chhanglet nghal a, Lalmawizuala ball pass chu Lalrintluanga'n a dan kawi hnuah Shillong Lajong midfielder hlui Jacob-a'n kawh zetin goal kilah a pet lut a, goal mawi tak a ni.

Goal khat hian Police tha thona a tireh pha lo a, hun tam zawk Chanmari West-in inkhel thunun mah se BS-a nauten an tha an thlah lo. West Warrior winger Vanlalthlamuana leh midfielder Jacob-a ten crossbar kawt zetin crossbar an pet per ve ve a, man of the match-a thlan Police goalkeeper VK Mal­sawma a che ṭha bawk.

Hun tawpah thiam leh van­neih a inkawp a, Fakzuala leh Valpuia ten wall pass ṭum hnih neiin mawi zetin Chanmari West tlarhnung an ṭhiat a, Republic Veng tlangval hian minute 85-naah chakna goal a khung.

Engtin zel?

Police-in hnehna vawi khat chauh la chang mah se nimin tlaiah Chhinga Veng leh Ramhlun North an inhnehtawk avangin vawi ruk khelh zawhah Samson Ramengmawia hote hi BS-a hote aiin point khat chiahin an hmu tam.

Police leh Ramhlun North te hi October 4, Nilaini zanah an inhmachhawn dawn a, he inkhel hian table-ah nghawng lian tak a neih dawn avangin ngaihven a hlawh khawp ang.

ZoFooty Statistics
Mizoram Police 2 - 1 Chanmari West
MPFC : Lalfakzuala 23'; F. Lalrinpuia 85'
CWFC : Jacob Lalrawngbawla 24'
MoM : VK Malsawma, MPFC
55% Ball Possession 45%
10(6) Shots (On Target) 12(7)
1 Yellow Card(s) 2
0 Red Card(s) 0
Powered by Rainbow Multibrand Mobile Showroom