Chelsea mikhual tur hmahruaitu City

Premier League champion lai Chelsea chuan season kal laia hmahruaitu Manchester City chu zanin dar 10:00 hian Stamford Bridge-ah an mikhual dawn. City tan hian striker Sergio Aguero dinhmun a chiang lo a, khawvel defender manto ber Benjamin Mendy chu khup hliam vangin a khel thei dawn lo bawk.

Season hmasa ṭan dawn khan Chelsea leh City hian manager thar an nei a, a tir lamah Pep Guardiola-a'n bul ṭan ṭha zawkin rinkai ni mah se season an khar meuh chuan Blues manager Antonio Conte a phak lohna chu point 15 zet a ni a, Italian manager hian Pep a hnuaichhiah chiang hle - season kal laiah pawh manager pahnih te hi nomawi inchuh tur langsar an ni leh phak.

Tun dinhmunah chuan City hian point 16 hmu tawhin Chelsea ai hian point thumin an hmu hnem zawk a, Blues hian hnehna an chang a nih chuan an nihrual thei ang a, City hi an chak lo a nih chuan an tlawmna hmasa ber a ni thung ang.

Aguero chiang lo?

Pep-a'n Argentina interna­tional striker Sergio Aguero chungah rinna a nghat ngam a, tun thlengin a la ti sual lo. Mahse, Blues lakah Aguero hi a inlan theih a beiseiawm loh, a inlan a nih pawhin nidanga a khelh anga khel tur chuan beisei ngam a harsa khawp ang.

Kum 29 mi Aguero hi chawlh hmangin Amsterdam-ah a kal a, concert-na hmuna a kal haw lam chu a car chuanna a chesual a, a nakruh a hliam. Nimin khan City chuan an striker dinhmun hi an enfiah a, he thu buatsaih lai hian an thutlukna an tarlang hman lo - Aguero hian tun season league match ruk a khelhah goal ruk a khung tawh.

Pound makataduai 52 man defender Benjamin Mendy pawh nimin khan Barcelona-ah a khup hliam zai a ni a, engtianga rei nge a chawlh a ngaih dawn hriat theih a la ni lo. Guardiola chuan, "Left back a khel thei player Danilo, Fabian Delph leh Fernandinho te kan neih avangin lungngaihna tur a awm lo," tiin a sawi tawh a, Mendy hmunruak hnawh khat tur a nei tih a chiang.

City hian tlarhnung thuam chak nan sum an hmang hnem a, a fuh chho hle niin a lang. League match rukah goal hnih chiah an la chhuah a, an khingpui lamah goal 19 an khung tawh avangin goal difference nei ṭha ber an ni mek - Blues hmatawngte tan sut hawn harsa ve tak tur an ni dawn.

Blues an dam

Season ṭha hmain Chelsea midfielder Eden Hazard a hliam a, a la inkhel tam tawk lo. Belgium in­­ternational hian inkhel bul-

ṭan tura a inpeih tawh zia lantir nan Champions League-a Atle­tico Madrid an hneh ṭumin a theihna a pho chhuak leh tawh.

Chelsea player manto ber Alvaro Morata chuan, "Eden hi khawvela player ṭha pathum zingah a tel phak. Thil harsa leh khirhkhan tak tak pawh awlsam takin a chinfel dan a hria a ni, a bula khelh chuan thil a awlsam phah," tiih Hazard a dahsang hle. Spain international leh Hazard te hian Atletico tlarhnung an chhaih buai hle a ni.

Kum 24 mi Morata hian Blues tan league-ah goal ruk a khung tawh a, an match hnuhnung ber a Stoke City an hneh ṭumin hat trick a siam, zanin hian Hazard nen an inkawp leh ngeiin a rinawm a, City tana ven ngun ngai bik tur an ni ang.

Real Madrid aṭanga Chelsea zawltu Morata chuan London club tana a khelh chhoh dan sawiin, "Chelsea tana ka official match hmasa ber chu Arsenal nen Communuty Shield kan inchuh kha niin penalty ka hlah a, a hrehawm duh hle, mipui lamin ka rilru hrehawm zia kha an hrethiam phak lo hial ang. Mahse, tunah chuan zawi muangin hma ka sawn zel a, inrin­tawkna ka nei tawh," tiin a sawi.