Australia-in India hneh

ODI series match nga khelh turah India-in series la fel tawh mah se Ningani khan Australia an ngam lo a, run 21-in an tlawm. Ram pahnih hian ODI series match nga an khelh turah match li khel tawhin India hian 3-1 in hma an hruai mek a, Pathianni chhun dar 1:30-a match ngana an khelh hunah Australia hian hnehna chang nawn pawh nise 3-2 in an tlawm dawn tho tihna a ni - India tan erawh Sri Lanka an whitewash hnua Australia whitewash an tumna a thamral.

Bengaluru khawpuia inkhelah hian Australia an bat hmasa zawk a, over 50-ah run 334 ngawt siamin wicket nga chiah an hloh. Mikhual team tan hian David Warner chuan run 124 ngawt vaw chhuakin century a siam a, run 94 siamtu Aaron Finch a che ṭha hle bawk. India bat hun a thleng a, over 50-ah run 313 chiah tlina wicket riat an hloh avangin a tlawm zawkah an ṭang ta a ni - India tana run siam hnem ber Kedar Jadhav chuan run 67 bak a tlin lo.