Europa League lamah Arsenal an filawr

Arsenal chuan an first team player tam zawk chawlhtir chungin Europa League an khel a, hnehna chang turin harsatna an nei lo. Ningani zan khan Theo Walcott-a goal hnih hmangin Bate Borisov chu 4-2 a hnehin Group H hmahruaitu an ni.

Borisov Arena, Belarus-a inkhelah Jack Wilshere-a ball duhthusam pek chu Walcott-a'n minutue kuana lekah a khung a, Bate keeper Denis Scherbitski-a ball vawm chhuah dawng fuhtu Walcott bawkin an goal hnihna a khung zui bawk.

Defender Rob Holding-a'n Arsenal tana a goal hmasa ber ni turin corner aṭanga ball rawn kal, captain Per Mertesacker-a'n a lo khawih per tawh chu hnai set sawt aṭangin a khung - minute 25-na lekah mikhual lamin goal thum faiin hma an hruai a, chawlhlawk hmain chak tur a chiang tawh.

Bate tan Mirko Ivanic chuan goal khat sut ṭhen ve mah se Olivier Giroud-a'n club tana a goal 100-na ni turin penalty

aṭanga a khung ve leh avangin Vitali Gayduchik-a goal khungin awmzia a nei thui tawh lo.

Europa a awlsam?

Arsene Wenger-a'n inelna zawng zawng ngai pawimawh mah se Premier League chu an dah pawimawh ber a nih thu a sawi tawh a, Belarus-ah pawh hian tun season kal laia a chhawr rim zingah defender Shkodran Mustafi chiah a inlantir - player dang zawng chu kartawp match khel tura hahchawlhtir an ni.

Rawlthar Ainsley Maitland-Niles leh Reiss Nelson te chu wing back atan hman an ni a, Joseph Willock chu central midfield-ah dah a ni bawk, anni pathum hian an khel ṭha hle. Hun tawp dawn lamah Marcus McGuane leh Edward Nketiah te chu an club tana an match hmasa ber an khelhna hun siamsak an ni bawk.

Premier League lama West Brom hnehtu zinga player pakua ngawt siksawi chung pawhin Arsenal hi Belarusian league lama pathumna Bate lakah kawng tinrengin an chungnung zawk a, season tir lama dem rawn hlawh tak manager Wenger chunga boruak sang lutuk pawh a ziaawm chho ṭana ngaih a ni.

Tlawm nei lo

Arsenal hian season bul an ṭan chhe hle, August thla khan result ṭha an nei thei lo a, league match thum an khelhah point thum chiah an hmu thei. An elpui Liverpool lakah 4-0 in an tlawm a, Reds laka an mualphona hian Wenger leh a naute a beng harh nia ngaih a ni.

September thla chhungin Gunners hian match ruk an khel a, Premier League champion lai Chelsea nen goal awm loin an inhnehtawk tih mai lo chu hnehna an chang fai vek. Mikhual tana chak harsatna hmun Bate khelmuala hnehna an chan avangin inrintawkna an neih belhchhah ang.

Bate hian European com­petition bikah an khelmuala an hneh loh hnuhnung ber chu Barcelona (2015) kha niin hemi hnuah match sarih chhung tlawm nei loin an kaltluang a, tunah Arsenal lakah an chak lo leh chiah a ni.

Arsenal manager Arsene Wenger chuan, "Bate hi team ṭha tak an ni a, player tawnhriat nei ṭha leh rawlthar rual inchawhpawlh an nih avangin hmachhawn an harsa hle, a bul kan ṭan ṭhat avang khan a lang awlsam hle a, chutih rualin hun tawp lam minute 20 chhung vel kha chu a harsa hle thung a ni," tiin a sawi.

Hmabak

Arsenal hian Pathianni zan dar 4:30-ah Premier League an khel zui leh nghal dawn, Emirates Stadium-ah kaithar Brighton an mikhual ang. Belarus-a hamrik hnuhnung ber a rik aṭanga darkar 62 hnu chiahah inkhel ṭanna hamrik hmasa a ri leh dawn, tun hnai ni ruk chhunga an match thumna tur a ni ang.

Hliam tenau neih vanga West Brom an hmachhawn ṭuma bul

ṭan lo Mesut Ozil a dam tawh a, Alexis Sanchez leh Alexandre Lacazette te hmatawngah an inthlawp thei bawk ang - Calum Chambers, Francis Coquelin leh Danny Welbeck te erawh hliam vangin an inlan dawn lo thung.

Arsenal leh Brighton te hi tun hmain vawi 15 an inkhel tawh a, Gunners hian vawi 11 hnehna changin ṭum hnih an tlawm a, vawi hnih dang chu an inhnehtawk thung.

Everton chak zo lo

Ningani zan inkhel dang­ah Premier League club dang Ever­ton chu an mikhual Apol­lon Limassol nen 2-2 in an inhnehtawk. Ronald Koeman-a team hian Wayne Rooney leh rawlthar Nikola Vlasic te hmangin goal an khung a, mah se an tlarhnung pawp vangin point khatah an lungawi a ṭul - mikhual defender Valentin Roberge chu hun tawp dawnah hnawhchhuah ni mah se inkhel result a thlak danglam phak tawh lo.

Toffees manager Koeman chuan, "Second half kan khel ṭha a, goal dang pawh khung thei tur kan ni. Mahse, kan team hian kawng hrang hrnagah duhthusam tawk lohna lai kan nei a, kan hriam tawk lo a ni. Table mawngphah luahtu kan nihna aṭang hian tal chhuah ngei kan tum ang," tiin a sawi. Everton hian Pathianni zan dar 6:45-ah Burnley an mikhual leh ang.