Verstappen-a'n beisei nei sang

Pathianni tlaiah For­mula 1 Malaysian Grand Prix tlan a ni dawn a, Max Verstappen chuan Asia-a intlansiak an neih turah hian beiseina a neih san thu a sawi. Zirtawpni khan practice race hmasa ber neih niin Red Bull driver hi pakhatna a ni.

Dutch rawlthar Ver­stappen hnungah hian a teammate Daniel Ric­ciardo a thleng a, Red Bull driver pahnih hnung­ah hian Fernando Alonso, Kimi Raikkonen, Sebastian Vettel leh championship hma­hruaitu Lewis Hamilton te an thleng zui leh bawk.

Kum 19 mi Verstappen chuan, "Season kan hman laiah Ferrari leh Mercedes te an elphak lo deuh tih chu hai rual a ni lo. Chutihrualin tun ṭumah hi chuan beiseina kan nei sang ve hle a ni, podium lawn ngei kan tum ang," tiin a sawi.

Malaysian GP an tlanna tur Sepang International Circuit hi kum 1999 March thla a hawn kha a ni a, 5.543km a thui niin kawng kawi 15 a awm a, Asia khawlmualpuia intlansiak an neihna zinga ngaihhlut berte zinga mi a ni.

Ram ṭhenkhatin Formula 1 inelna an thlen chhunzawm theih loh tur thu an sawi nual a, an hma hun sawi chiang thei lo pawh an awm bawk. Hetiang boruak karah hian China chuan kum thum chhung atan inremna an siam leh ta a, kum 2020 thleng chu Shanghai-ah Formula 1 intlansiak a awm chhunzawm dawn.