Mizoram tan Zakhuma'n medal la

Nationals Games 2022 neih laiah Mizoram chuan nimin khan medal hmasa ber an la. Weightlifting huangah Zakhuma chuan bronze medal a chawi chhuak a, 61kg inelna huangah a ṭha pathumna a ni phak.

Nimin khan Mahatma Mandir, Exhibition Hall 1, V2, Gandhinagar-ah inelna hi neih niin, Mizo rawlthar hian snatch (113kg) leh clean & jerk (141kg), total-ah 254kg a chawi a, a chungah midang pahnih an awm.

Pakhatna chu Aruna-chal mi Charu Pesi niin, ani hian total-ah 259kg a chawi a, pahnihna Muna Nevek (Services) chuan 255kg a chawi thung. Pahnihna leh Zakhuma inthlauhna hi 1kg chauh a ni.

Lei aṭanga chawi tlang nghalah (snatch) chuan Zakhuma hi pahnihna a ni lailawk a, mahse lei aṭanga chawi kan hnua awma dah, chumi hnua char lehah (clean & jerk) Nevek hian a rawn khum - Mizo rawltharin khum let leh tuma a beihna a hlawhtling zo ta lo.

Weightlifting huangah hian Lalzuidika pawh a inlan tho a, mahse medal a hlawh chhuak phak lo. Muanna Veng rawlthar hi palina a ni a, ani pawh hi a vanneih ṭum chu ni se medal hlawh chhuak thei tur zinga mi a ni.

Vawiin hian Jacob Vanlaltluanga chu 67kg huangah a inlan dawn a, a lakah beiseina a awm. 67kg huanga khel thei, champion tura rinkai ni bawk Jeremy Lalrinnunga erawh hliam damkawr a la nih avangin a inlan thei rih lo.

Mizoram weightlifting coach Malsawma Khiangte chuan, "Naupan lai aṭanga kan chher ngei maiin National Games-a medal a la thei hi ka lawm. Jeremy leh Jacob-a te nena inzirho kha an ni a, hlawhtlinna an chang zel hi Pathian chungah ka lawm," tiin Vanglaini a hrilh a, vawiina inlan tur Jacob-a pawhin a chawi sual loh chuan medal a lak ngei a rin thu a sawi bawk.

Vawiin hian weight-lifting bakah archery pawhin inelna an hmachhawn ṭan dawn bawk a ni.