City-in Haaland hoin United mikhual dawn

Pathianni zan dar 6:30 hian Eithad Stadium-ah Manchester Derby khelh a ni dawn. Pep Guardiola kaihhruai Manchester City-in Erling Haaland an neih belh a, Premier League champion lai an nih bawk avangin an buk a rit hle. Man United pawh Erik Ten Hag hnuaiah harhtharna an chang mek a, City hmaah fiahin an awm ang.

Goal tam?
Man City hian Etihad Stadium-ah Bournemouth (4-0), Crystal Palace (4-2) leh Nottingham Forest (6-0) te an mikhual tawh a, goal 14 ngawt an khung. Kumin March thla khan Man United hi an mikhual a, 4-1 in an hneh. Record thlir chuan Pep-a hoten goal an surtir mai a rinawm.

City hian an intawn hnuhnun bera goal hnih khungtu pahnih Kevin de Bruyne leh Riyad Mahrez-te an la kawl ve ve bakah Erling Haaland an neih belh.

Norwegian striker Haaland hian Premier League-ah match sarih lek khel chungin goal 11 a khung der tawh a, Man United team pumpui hian league-ah goal riat chiah an la khung - hei hian Haaland-a ropuizia a lantir.

Haaland chuan, "Derby awmzia hi ka hria a, ka inpeih tawh. Balotteli-a'n Old Trafford-a 'Why Always Me?' kawr nena goal khung a lawm pawh ka la hria, tunah chuan hriatreng tur thil thar hnutchhiah ve ka duh," tiin a sawi a, United ṭantute tan hriat nuam a ni lo ang.

Haaland vs Martinez
Manchester United-in hliam vangin captain Harry Maguire an chhawr theih a rinawm lo a, tlarhnungah Raphael Varane leh Lisandro Martinez-te an inkawp a rinawm. Martinez hi 5ft 9in-a sang a ni a, a ven tur Haaland hi 6ft 5in a ni thung.

Argentine defender Martinez hian season bul a ṭan ṭhat avangin fak a hlawh a, Haaland hmaah fiahin a awm dawn. Hei erawh hriat a ṭha, Borussia Dortmund leh Ajax inhmachhawn ṭumin player pahnih hi an inhmachhawn tawh. Martinez-a telna team hian Haaland-a telna team hi 4-0 in an hneh.

Midfield Battle
Pep Guardiola naute an nih tawh chuan ball an chang tam ṭhin a, City-in Kevin de Bruyne, Rodri leh Bernardo Silva-te an kawl avangin mual laia inkhel thunun tur zawkah a ngaih theih. Mahse, Man United hian Christian Eriksen an nei tawh a, Danish midfielder awm hnuah an ṭha sawt.

Eriksen hi Bruno Fernandes leh Scott McTominay-te nen an inkawp a rinawm a, Scottish midfielder hian sawisel hlawh ṭhin bawk mah se Ten Hag-a'n Casemiro aiin a la thlang zawk. Derby-ah hian Casemiro-a'n bul a ṭan thei a, an khelh tawhna thlir chuan McTominay-a'n bul a ṭan a rinawm zawk.

Ronaldo vs Haaland
Man United-in hliam vangin Marcus Rashford leh Anthony Martial te an chhawr theih a rinawm lo a, tlarhmaah Cristiano Ronaldo a langsar ta ber. Portugal captain Ronaldo hi a upat ve tawh avangin a ṭuan a fum ve tawh a, tun hma a pha tawh lo. Chutihrualin derby-ah chuan a tawnhriat ringawt pawh hi a hlu thei viau ang.

Mual sira awm tur erawh a chiangah a ngaih theih a, ball thiam pahnih Antony leh Jadon Sancho ten Ronaldo an thlawp a rinawm a, City tlarhnung tan en liam ngawt chu an harsa ang. City erawh Haaland ringawt pawh chhuanpui tham a tling a, Phil Foden leh Jack Grealish ten an la thlawp thei bawk.

Fiahna chu
Man United hian season bul ṭan chhe mah se tunah erawh point 12 hmuin Man City an phak lohna chu point nga chauh a ni a, match khatin an la khel tlem zawk. Erik ten Hag-a hote hian Etihad Stadium-ah hnehna an chang a nih ngat chuan Pep-a hote hi champion nawn tura rinkai lawrlak an ni tawh bik lo ang.

Premier League-ah Man City an chungnun avangin Pep-a hote hi team dang zawng tan tehfung an ni pha a, Man United hi eng ang chiaha ṭha nge tih pawh City aṭanga teh hi a him dawn.

Ten Hag-a hote hian Arsenal leh Liverpool an hneh tawh a, Pep-a hote an hneh leh a nih chuan champion sawi ri ngam tur an ni ve tawh ang.