Huai zawk nih inchuh tur Arsenal leh Spurs
"Tun season ka hmuh chinah club mala Premier League thunun an awm rih lo, chuvangin champion theihna kawng a inhawng zau," tiin Arsene Wenger-a'n Arsenal tan champion theih a nih thu a sawi a, a club hlui hian an beisei ngam loh an beisei phah a nih pawhin a mak lo ang.
Vawiin tlai dar 5:00 hian Emirates Stadium-ah Arsenal chuan an hmelma Tottenham Hotspur an mikhual dawn, club pahnih hi champion nih inchuh tia sawi theih an ni a, mahse nomawi inchuh tia sawi ngam chu an la harsa - a sang pali zinga tel tum ve ve erawh an ni.
Antonio Conte naute tan Gunners hneh hi a awlsam dawn lo, khualmual bikah chuan Spurs hian an intawn hnuhnung vawi 29-ah vawi khat chiah hnehna an chang, an thil tih theih zen zen loh tih an tum dawn.
Hei erawh hria ila, season hmasa khan Arsenal hi Champions League khel thei dinhmun duhawm taka an ding tawh chu Conte enkawl Spurs hian an nek chhuak. North London club ṭha zawk nih inchuh hi a hmuhnawm dawn.
Conte a lungawi
Premier League champion lai Manchester City leh Spurs chauh hi tun season EPL-ah tlawm la nei lo an ni, Italian manager hian hna a thawk ṭha tih chu inzawh nawn a ngai lo - season hmasa chawhnu lam aṭang khan team nghet tak a din.
Hna a thawh ṭhat miau avangin a club hlui Juventus pawhin lak let an duh nia sawi a awm, mahse Conte chu North London club-ah a hlim rih. Harry Kane leh Son Heung-min te enkawltu nih a la duh rih.
Conte chuan, "A hun dik takah chuan thutlukna ka siam mai ang, tun dinhmunah chuan ka awmna hmunah hian ka hlim," tiin Tottenham enkawl nuam a tih thu a sawi a, amah ang bawka manager ni lai Massimiliano Allegri dinhmun chu zah phu a nih thu a sawi bawk.
Italian defender hian Arsenal lakah Hugo Lloris a chhawr thei dawn em, tih a chiang lo. Spurs captain hi France squad aṭangin a inhnukdawk a, club training chu zawm tawh mah se 100% a la ni lo, nimin tlai thleng kha chuan a dinhmun tur an la ngaichang.
Arsenal fiahna
Mikel Arteta leh a naute hi Premier League club lian dangte elphak turin an ṭha tawk em, tih chu fiah a ni dawn. Arsenal hi Premier League match sarih aṭanga vawi ruk chak thei an ni a, table chung berah an awm.
Season bul ṭan fuh viau mah se, an elpui tur Manchester United an ngam lo. Tottenham dawtah hian Europa League-ah Bodo/Glimt leh Premier League-ah Liverpool an hmachhawn zui leh nghal dawn, season tir che fuh satliah nge team nghet pangngai an nih chu kan hre thuai ang.
Defender Gabriel, striker Gabriel Jesus leh forward Gabriel Martinelli te khel ṭha viau mah se Brazil tan koh an ni lo. Anni pahnih hian hahchawlhna hun an neih phah thung a, an ram coach Tite lungtiawi turin Arsenal tan chet nat lehzual an la mamawh.
William Saliba erawh France tan a khel phak a, inrintawkna a neih belh ang. Hliam Emile Smith Rowe leh Thomas Partey la awm thei dawn lo mah se, captain Thomas Partey leh Oleksandr Zinchenko te erawh an inlan theih a rinawm - Gunners tan chanchin ṭha a ni ang.