Barcelona-in hliam an ngah; an talbuai dawn em?

Nipui transfer-a sum hmang na tak, an beisei ang ngeia result pawh nei chho Barcelona-in international break-ah chanchin lawmawm lo hriat tur an nei a, an player engemaw zat chu hliam nei chungin Nou Camp-ah an kir!

Barcelona-in chanchin lawmawm lo an hriatna lam hi France, Netherlands leh Uruguay aṭangin a ni a, Ousmane Dembele, Jules Kounde, Memphis Depay, Frenkie De Jong leh Ronald Araujo te chu international break-ah an inhliam.

Hetihlai hian Real Madrid-in chanchin lawmawm lo hriat tur an nei ve tho a, an midfielder pawimawh Luka Modric chu hliam nei chungin Santiago Bernabeu-ah a kir ve bawk.

Kartawpah La Liga club lian pahnih hi an la inlan dawn zui ve ve. Barca hian zanin dar 12:30-ah Real Mallorca an lenchilh dawn a, Real Madrid chuan Pathianni zan dar 12:30-ah Osasuna an mikhual dawn bawk.

Rilru a buai
Barca player inhliam zingah Araújo chu malpui hliam zai ngai khawpin a awm a, World Cup a khelh theih dawn leh dawn loh a chiang lo - Uruguay lam chuan Qatar-a chhawr an duh avangin inzai lo mai turin an ti a, mahse, Araujo chuan he ngenna hi a hnar niin an sawi.

Kum 23 mi centre back chuan, "Club leh ram inkara thutlukna siam lam a ni lo. Ka club leh ram ka hmangaih ve ve a, professional hrang hrangte nen kan inrawn hnuah inzai mai kan ti ta zawk a ni," a ti a, 100% a a dam leh theih nana inzai thlang a nih thu a sawi.

Barca-in tun season-ah minute 720 khelmualah hun an hmang tawh a, minute 601 chu Araujo hi khelmualah a lut - a tel loa inrem fel dan Xavi-a'n a ngaihtuah a ṭul dawn a, lu hai tizual turin Kounde a inhliam bawk.

Sevilla aṭanga lakluh defender hi kar engemaw zat a chawlh a ngaih tur thu sawi a ni a, Hector Bellerin chu training-naah a inhliam bawk - hliam tenau nei Sergi Roberto dam vat a ṭul a, centre back-ah Andreas Christensen leh Eric García mawhphurhna a sang chho viau bawk ang.

Lungphang lo la!
De Jong dam hun tur he thu buatsaih lai hian a la chiang lo a, Depay dinhmun pawh sawi theih a ni lo - player pahnih hi zaninah chuan an inlan dawn lo chiang a, mangan lutukna tur erawh a ni lo.

Barca hian midfield-ah Franck Kessié, Sergio Busquets leh Pedri an nei a, De Jong awm lo an tuar lutukin a rinawm lo a, Depay hian Xavi hnuaiah hmun a chang phak meuh lo bawk.

Hetihlai hian Barca fans tan chanchin lawmawm tak hriat tur a awm a, Dembele hliam a na lo a, zaninah inlan nghal thei tura beisei a ni. Hetihlai hian Robert Lewandowski a dam ṭha bawk.

Nilaini khan Barca chuan training la ṭan lo mah se Lewy hian amahin training a nei nghal a, "Chawlh a nih avangin chhuanlam a awm tur a ni lo a, train a hun leh tawh zawk e," tiin social media lamah a tarlang - tun season match riatah goal 11 a khung tawh.

Sorry Modric
Real-in international break an tuar ve tho a, Modric chu hliam nei chungin a kir - mahse, Croatian midfielder hi a rei berah ni 10 bak a chawlh a ngai lo tura ngaih a ni a, Osasuna (October 2), Shakhtar Donetsk (October 5) leh Getafe (October 8) a hmachhawn thei lo ang.

Madrid khaw club player zingah Eden Hazard leh David Alaba te pawh international break-a inhliam an ni a, mahse, an hliam a serious loh avangin Carlo Ancelotti-a'n a duh chuan Pathianni zanah a chhawr thei nghal tura ngaih a ni.

Real tan chanchin lawmawm dang a awm a, chu chu Karim Benzema dam thu hi a ni - French striker hian rei tak a inlan theih loh hnuah training a zawm leh tawh a, Real ṭantu tan rinawm a ni ang.

Osasuna lakah erawh bul a ṭan nghal a rinawm chiah lo a, bench lamah hun a hmang phawt a nih pawhin a mak lo ang - kum 34 mi striker hian season hmasa khan Real tan match 46-ah goal 44 a khung a, tun season-ah match ruk khelin goal li a khung.

Atletico vs Sevilla
Tun kartawp La Liga inkhel ngaihven hlawh zingah Atletico Madrid-in Sevilla an lenchilh tur chu a tel a, zanin dar 10:00-ah team pahnih hi an inhmachhawn dawn - a hmuhnawm ang.

Real leh Barca rorelna hmunah club pahnih hi Spanish football-a club ropui pahnih chhaih buai pha ber an ni a, mahse, tun season-ah club pahnihin beisei an phak lo - lei rem rah tuma an inher lai mekin an intawng dawn.

Atletico hian tun season-ah tluk leh din an fawm a ni ber - league match hmasa berah 3-0 in Getafe ngam mah se, Villarreal (2-0) lakah an tlawm zui a, Valencia (1-0) laka an chak hnuah Real Sociedad (1-1) an inhnehtawkpui a, Celta Vigo (4-1) an sawp hnu lawkah Real (2-1) an ngam lo leh bawk!

Champions League lamah match hmasa berah chak mahse, match hnihnaah Bayer Leverkusen chu 2-0 in an ngam lo leh bawk a, zanina an tawn tur Sevilla hi tun season-a league match ruk an khelha vawi khat chiah la chak an ni thung - insiamrem tum team pahnih intawng tur hi a hmuhnawm dawn.