Liverpool an dam ṭan, mahse...

Season bul ṭan ṭha lo tak Liverpool chuan zanin dar 7:30 hian league match khel turin Brighton & Hove Albion an hmachhawn dawn a, Reds fan-ten chanchin lawmawm leh lawmawm lo hriat tur an nei.

Khup hliam vanga tun season-a la inlan lo Ibrahima Konate chuan Ningani khan club training a zawm leh tawh a, hetihlai hian Diogo Jota erawhin training a la zawm lo thung.

Jota hian Konate ang thoin Reds tan season bul a ṭan thei lo a, tun thlatira Everton nen 0-0 a an inhnehtawkna inkhelah khan a lo kir ve leh chauh.

Mahse, international break-ah Portugal tan inlan tura koh zui a ni a, Spain laka 1-0 a an tlawm ṭumin coach hnenah la chhuak turin a ngen bawk - a inhliam vang niah an ngai hlawm.

Mahse, Jota hian, "Pre-season pawh ka nei thei lo a, tun season-a bul ka ṭan vawi hnihna chauh a nih bawk avangin ka chau a ni," tiin a chhuah chhan a sawi.

Jota thusawi avangin Reds fan-te thlamuang hman viau mah se, Portuguese forward hian international break hnuah club training a la zawm leh lo a, he thu buatsaih a nih lai hian thuchiang a la awm lo.

Hetihlai hian Reds tan tlarhnunga Konate dam ṭan chu chanchin lawmawm a tling a, Joel Matip a dam tawh bawk avangin Jurgen Klopp-a'n tlarhnung laiah duhthlan tur player a ngah sawt dawn.

Tun season-a la inlan miah lo, second choice keeper Caoimhin Kelleher leh right back thar Calvin Ramsay-te pawhin club training an zawm leh tawh a, Liverpool an dam ṭan.

Premier League champion nih inchuh a, Manchester City nena inel ber tura ngaih Reds hian beisei angin season bul an ṭan lo - league match ruk an khelh tawhah vawi hnih chiah chakin, table-ah pariatna an ni mek.

Champions League-ah pawh 4-1 ngawta Napoli ngam loin bul an ṭan a, mahse, match hnihnaah 2-1 a Ajax hnehin an insiamṭha leh tawh - Reds hian Queen Elizabeth II thihna avangin Merseyside derby-a Everton an draw hnuah match an la nei leh lo a, Wolverhampton Wanderers leh Chelsea nena an inkhel tur chu sawn a ni.

Zaninah season bul ṭan ṭha tak Brighton an hmachhawn dawn a, Reds fan-ten an team chak lai hmuh an duh ang.