Singapore Grand Prix a hmuhnawm dawn

Pathianni zan dar 6:30 hian Formula 1 Singapore Grand Prix tlan a ni dawn a, driver championship hmahruaitu Max Versta-ppen chu a vawi hnih nana world champion ni thei dinhmunah a ding mek - Asia khawmualpuia intlansiak tur hian ngaihven a hlawh zual phah.

Marina Bay Street Circuit-ah mipui an tam dawn, kar hmasa tawp lamah khan ticket an hralh zo vek tawh. Hripui leng vangin season hnih chhung Singapore GP an tlan thei lo a, tunah chuan an duhtawkin mipui an pungkhawm leh thei tawh.

Red Bull driver tan champion nemnghet turin hnehna chan a ngai, chak ringawt pawh a tawk lo. Max-a hi chak se, amah hnaih bertu Charles Leclerc chu pariatna aia hniamah a awm a ngai, chhiarkawp danin theih ni mah se kawng a la zim rih hle.

Leclerc chauh sawi theih a ni bik lo. Verstappen-a teammate Sergio Perez chu palina aia hniam a nih tel a ngai, season an hman dan chhutin driver pathum hi a thleng hma zinga mi an ni ṭhin a, tun ṭumah pawh hian an inthlau vak lo mai thei.

Dutch tlangval Verstappen chuan, "Nghah rih deuh a ngaih ka ring," tiin a lo sawi tawh. A thu sawi hi a mak hran lo, tun hmain Singapore Grand Prix-ah hian hnehna a la chang ngai miah lo, a tih ṭhat ber chu 2018 kha niin pahnihna dinhmun a luah.

Season kal laiah Leclerc hian intlansiak a tlan zawh theih chinah, hnung taka tlan a ngei ngai lo - parukna aia hniama thlen a la nei miah lo. A tlan tluan thei a nih ngat chuan Max elphak turin a ṭha tawk tihna a ni.

Kuminah intlansiak hmabak paruk an la nei a, tun ṭumah hian Verstappen a champion nghal kher lo a nih pawhin nomawi chu a humhim theih ngei hmel tho. October 9, Pathiannia tlan tur Japanese Grand Prix chu champion nemnghehna a nih zawk a rinawm.

Verstappen boruak a ṭhat viau lai hian Lewis Hamilton erawh a record ṭha tak chu tawp thei dinhmunah a ding mek. Britain tlangval hian F1 a hmachhawn tawh chinah, season tin vawi khat tal hnehna a chang ziah.

Mahse, kuminah erawh intlansiak vawi 16 an neih tawh chinah Hamilton hian chak ni hmel a la hmu miah lo, hmabak paruk an la neihah hian vawi khat tal chu tlan chak ber nih a tum ngei ang, hna erawh a hautak dawn.

World champion vawi sarih ni tawh Lewis chuan, "Hlawhchhamna leh hun khawhral kumah ka ngai lem lo, hmasawn kum a ni zawkah ka ngai," tiin a sawi a, kumin chauh ni loin nakkum lamah pawh kan la hmuh chhunzawm dawn niin a lang.