Huth-a'n Potter a ring zo lo

Chelsea defender hlui Robert Huth chuan Blues coach thar Graham Potter chungah rinna a nghah ngam loh thu a sawi a, Thomas Tuchel bana, Potter an lakluh avangin London club chuan top four-ah pawh season an khar loh mai theih thu a sawi!

Huth chuan, "Hetiang ang thutlukna, transfer bazar khar hnu lawka coach ban hi vawi engzat nge kan hmuh tawh? Chelsea hian top four chu an hnaih viau mai thei, mahse, Potter ka zah lohna ni lo se, coach dang hi en teh u.

"Pep Guardiola, Jurgen Klopp, Antonio Conte leh Mikel Arteta an awm a, an inelna level en hian ani aiin tawnhriat an nei ṭha vek. Chelsea hian a sang pali zingah season an khar lo ang tih ka hlau a ni," a ti a, Chelsea tana Premier League nomawi pahnih leh Leicester City tana league nomawi pakhat chawitu defender hian Potter chungah rinna a nghat ngam lo.

Brighton & Hove Albion coach hlui kaihhruaina hnuaiah Chelsea hian match khat chiah an la khel a, Champions League-a hneh ngei tura ngaih Red Bull Salzburg chu 1-1 in an inhnehtawkpui.

Queen Elizabeth II thihna avangin Chelsea hian Fulham leh Liverpool an hmachhawn thei lo zui a, zanin dar 7:30-ah team tawh khirh Crystal Palace an lenchilh dawn - Potter tan fiahna a inṭan dawn, tiin a sawi theih.

London club hian tun season-a league match ruk an khelhah vawi thum chiah hnehna an la chang a, vawi khat draw neiin vawi hnih an tlawm - table-ah pasarihna an ni mek.

Champions League lamah pawh match hnihah point khat chiah an la nei a, group E-ah table mawngphah an luah mek avangin Potter tan hnathawh tur a la tam hle.

Hetiang boruak karah hian Potter chuan Inter Milan-a loan-a khel mek Romelu Lukaku chu titipui a tum nia sawi a ni a, Stamford Bridge-ah kir a hreh lo a nih chuan hruai kir a duh niin khawthlang media-ten an tarlang.

Potter hian season hmasa khan Inter Milan aṭangin Chelsea hi pound maktaduai 97.5-in a zawm a, inelna hrang hrangah goal 15 khung mah se a man zat nena ngaihtuahin beisei a phak lo a, Inter-ah season khat atan loan-in a kir a ni.