Inter mualah Mourinho enkawl Roma

Jose Mourinho-a'n tun hmain Inter Milan a enkawl tawh a, hlawhtlinna hrang hrang a chanpui. Portuguese manager hi tunah chuan AS Roma manager a ni tawh - zanin dar 9:30 hian a club hlui hmachhawn turin San Siro a pan dawn.

Inter hian Serie A hmahruaitu Napoli chu point liin an phak lo mek. Thawhlehni zanah Champions League khel turin Barcelona an mikhual zui leh a ngai dawn, league chauh ngaihtuah theih a ni dawn lo.

Season bul an ṭan fuh tawk loh avangin Simone Inzaghi chu ban mai theih dinhmunah a ding niin media lamin an ziak nasa. Mahse, club vice president Javier Zanetti leh CEO Giuseppe Marotta te erawh chuan an coach hi an chhan.

Zanetti chuan, "Keini chu Simone lamah kan ṭang reng, kan duh leh tum anga thil a kal loh chiah hian kan thawhhona a ṭhat zual a ngai, harsana hi team anga paltlang a ngai," tiin hun harsa deuh tawk mah se an ṭanho tur thu a sawi.

Chelsea aṭanga an lakkir Romelu Lukaku chu August thla hnu lamah a la inkhel leh lo a, Belgium international striker awm lo hi an tuar - tihrawl hliam vangin match ruk an chhawr thei lo tawh, zaninah pawh a la inlan lo ang.

Inter Milan boruak fuh ber lai a ni lo a, chutihrualin an mikhual tur AS Roma pawh an chet ṭhat lai ber a ni bik lo. Atalanta an ngam loh hnuah erawh match hnih an khel leh tawh, hengah hian hnehna an chang ve ve.

Juventus tana contract hmang zo, man nei loa an lakluh Paulo Dybala chu mipui mit fukna a ni dawn. Argentina international hi Mourinho-a'n a hmang thiam viau, tlarhma lamah Tammy Abraham nena an inkawp hi Inter tlarhnung tan ven harsa an niin a rinawm.

Hei erawh hriat a ngai - Jose Mourinho hian Inter Milan hi vawi thum a hmachhawn tawh, a la tlawm vek. Season hmasa khan Roma enkawl chungin ṭum thum an intawng, league match hnih bakah Coppa Italia-ah a chak lo zawk an ni.

Portuguese manager hian a vawi khat nan Inter hneh a tum dawn tihna a ni. Scudetti, Coppa Italia, Supercoppa Italiana leh Champions League title a lak pui tawh Nerazzurri a hneh thei a nih chuan Serie A champion an tum ngam takzet tih a takin an lantir a ni ang.