Pathianni zanah India leh South Africa

Barsapara Stadium, Guwahati-ah Pathianni zan dar 7:00 hian India-in South Africa an hmachhawn dawn. Men in Blue tana chanchinthar ber chu Jasprit Bumrah a inhliam a, Proteas nena an inkhelh hmabak a khel thei tawh dawn lo.

India ṭantute tana chanchin duhawm lo erawh bowler ṭha mi Bumrah hian T20 Cricket World Cup a khel dawn lo a, player pawimawh dang Ravindra Jadeja a inlan theih dawn lo bawk. Men in Blue-in Australia ramah T20 World Cup nomawi chawi tum viau mah se player pawimawh tel loin hna a harsa dawn.

Chutihrualin tunah erawh South Africa nena an inkhel turah insawrbing a ṭul dawn a, India bowler-ten en bik an hlawh dawn. Trivandrum-a an inkhelh ṭumah Arshdeep Sing (32/3), Deepak Chahar (24/2) leh Harshal Patel (26/2) te an che ṭha a, Guwahati-ah pawh an chet ṭhat chhunzawm a ṭul ang.

Batting lamah KL Rahul-a'n thi loin 51 runs a siam a, ani hi nghel nghet taka a chet ṭhat a ṭul. Tun hnaiah Suryakumar Yadav a che ṭha a, South Africa nen pawh thi loin 50 runs a siam. Hming langsar Virat Kohli leh captain Rohit Sharma ten chet ṭhat ṭum an nei a, tun aia an rintlak a ṭul hle.