Galtier-a'n a club hlui hmachhawn dawn

PSG-in zanin dar 12:30 hian Nice an mikhual dawn a, an khingpui tur hi manager Christophe Galtier club hlui a ni. Season liam ta khan PSG hian Nice hi ṭum thum an hmachhawn a, goal-ah an khung miah lo!

Tun season-ah erawh PSG-in goal khung nuam an ti a, Ligue 1 match riat lek aṭangin goal 26 an khung tawh. Inelna hrang hrang thlir phei chuan tlarhma pathum Kylian Mbappe, Neymar leh Lionel Messi te goal khung belhkhawm chu goal 27 a tling tawh bawk.

Tun international break-ah khan PSG trio te hian an ram tan goal an khung vek a, Nice tlarhnung tan thu hriat nuam a ni lo ang.

French club hi Nice hi a neitu British billionaire Jim Ratcliffe-a'n a thlawp ṭha a, nipui bazarah Kasper Schmeichel, Aaron Ramsey leh Ross Barkley te an lalut. Amaherawhchu manager Lucien Favre hnuaiah result ṭha neih an harsat a, PSG lakah point hmuh a awlsam lo ang.