An hnawl hnu Bruyne-a'n Chelsea a vêl

Premier League champion lai Chelsea chu an khelmualah Manchester City 0-1 a hneh loin an tlawm. Stamford Bridge-a goal awm chhun hi Kevin de Bruyne-a'n amah duh loa hralhtu Blues laka a khung a ni. Pep Guardiola naute hian point 19 hmuin league table hmahruaitu an ni mek.

Bruyne-a goal
Manchester City hian tun hnaia an striker hriam ber ni mek Sergio Aguero chu a nak ruh na vangin an chhawr thei lo. Argentina international hi Ningani khan Amsterdam-ah a car chuanna a chesual a, a inhliam. Chelsea hian Stoke City laka hattrick siamtu Alvaro Morata chu hliam vangin chawlhlawk pawh a ral hmain an thlak a ngai ve bawk.

Season kal laia league bika goal khung hnem ber City (22) hi Aguero tel lo chuan nidang angin an tlarhma a hriam tawk lo a, Fernandinho-a tauh chu Chelsea keeper Thibaut Courtois-a'n ṭha takin a dansak. Striker Gabriel Jesus-a volley luh ngei tura lang chu goal line aṭangin Blues defender Antonio Rudiger-a'n a tauh chhuah sak hman bawk.

City-in an hun ṭha an khawhral nual hnuah minute 67-naah an mamawh goal an hmu. Brazil international Jesus leh Belgium midfielder ten mawi taka ball an inpek kual hnuah box pawn aṭangin Bruyne-a'n a ke vei lamin kawh zetin a pet lut - ram tana a khelhpui Courtois tan dan ngaihna a awm lo, team pahnih danglamna thlentu a ni.

Rinkai City
Pep Guardiola enkawlna hnuaia kal filawr mek City hian September thla chhungin khualmualah Watford 6-0, Liverpool leh Crystal Palace 5-0, Feyenoord 4-0 leh Chelsea 1-0 te lakah hnehna an chang vek a, goal khung an harsat loin an tlarhnung a phui hle bawk.

League match ruk a khelh aṭanga goal ruk khung thei Aguero awm loh niah chakna goal khung thei player an nei a, ṭum dang angin goal khung ṭeuh lo mah se an mamawh zat an nei thei lo. Rawlthar Jesus, Leroy Sane leh Raheem Sterling te inkawp chu goal ven thiam Blues tan an hnawksak hle.

City hian khawvela defen­der manto ber Benjamin Mendy chu khup na vangin an la chhawr thei lo zel. France international hi eng tiang chena rei nge a chawlh dawn tih a la hriat loh a, tun dinhmunah chuan Mendy tel lo pawhin wing back lamah buaina an nei rih lo.

Spanish manager Guardiola naute hi an khelh chhoh danah chuan champion tura rinkai an ni mek. Amaherawhchu, season hmasa kha hriatreng a pawimawh ang. Nikum October thla khan City hi league hmahruaitu an ni a, Antonio Conte enkawl Blues aiin point riatin an sang zawk - season a tawp meuh chuan Italian manager hi a chung berah a awm leh daih thung.

Blues an chau
Chelsea hian season hmasa khan European football an khel phak lo a, kuminah erawh league champion an nih avangin Champions League an khel. Thawhlehni zana City an inkhelh laiin Chelsea hi Nilaini zanah Atletico Madrid khelmualah an lenglut thung. Kartawp inkhel tur inbuatsaih nan darkar 24-in hun an nei tlem zawk tihna a ni.

Real Madrid aṭanga an lakluh Morata-a'n goal ruk lai khung tawhin Atletico lakah pawh goal khung bawk mah se City hmaah a hriam tawk lo a, hliam a neihzui bawk avangin a vanduai. Midfielder Eden Hazard a dam tawh a, Belgium international hi Blues goal nawrna thahrui pawimawh a ni nachungin season hmasa Hazard kan hmuh ang erawh kha chu a la ni phak lo.

Chelsea manager Antonio Conte chuan, "A zawna match hautak khelh a ngaih chuan na taka khingpuite nawr hi a harsa a ni, chutihrualin kan chak loh avangin chhuanlam kan siam tur erawh a ni lo," tiin an chak loh vangin chhuanlam siam a tum lo.

Italian manager Conte chuan Morata chungchang sawi zuiin, "Hliam a nei a, nat zual a hlauh avangin amah khan thlak a duh a ni," tiin a striker chungchang a sawi. Conte hian an result chu pawm thiam harsa hle mah se a nauten an theihna zawng zawng an hlan avangin lawmna tur a neih tho thu a sawi bawk.

Chelsea hian Stamford Bridge-ah chuan point an hloh khat hle, tun season kal laiah an khelmuala league match an khelh tawh aṭangin point riat an chan tawh a, season hmasa pumpuia an hloh aiin point hnihin a tam tawh zawk - Conte naute hian nomawi humhim an duh a nih chuan insiamṭhat an mamawh.

De Bruyne faktu Pep
Champios League group stage lamah Shakhtar Donetsk an hneh ṭuma goal a khung hnuah Kevin de Bruyne chuan chakna goal a khung leh, City manager Guardiola chuan, "Kevin kan nei hi chu kan vannei a ni, holding midfielder a ni a, khelmual sirah pawh hun a hmang thei bawk. Hmun nga velah ṭha takin a khel thei ang," tiin goal khungtu a dah sang hle.

Chelsea midfielder hlui De Bruyne hian kum 2016 August thla khan City a zawm a, Etihad Stadium a pan hnuah a club tan hian Premier League match 43 khel tawhin goal 28-ah a inrawlh tawh - goal sarih khungin assists vawi 21 a nei thung. Chelsea manager Conte pawhin, "Player ṭha chungchuang a ni," tiin Bruyne hi a fak ve bawk.

Barcelona manager hlui Guardiola-a'n inelna hrang hrangah Chelsea vawi riat a hmachhawn tawh a, penalty shootout chhiar tel lohin a ṭum khat nan hnehna a chang, vawi thum a chak lo zawkah ṭangin vawi li dang chu a inhnehtawkpui.

Pep chuan, "Mikhual tana inkhelh a harsatna hmunah point thum kan hmu a, kan tum ram kan thleng tihna erawh a la ni lo. International break a awm dawn a, chumi hnuah tuna kan khelh ṭhat ang hian khelh ṭhat chhunzawm leh theih ngei ka duh," tiin a sawi.