Palace mangchhia belhtu Manchester United

Manchester United-in Inrinni zanah Crystal Palace 4-0 in an sawp. United-in point 19 hmu­in table hmahruaitu Manchester City nen an point hmuh zat a inang a, Palace erawh league-ah goal la khung loin point an la hmu lo bawk.

Old Trafford-ah Uni­ted tan Juan Mata-a'n minute thumna lekah Mar­cus Rashford-a thawh­rah sengin goal hmahruai a khung a, Belgian mid­fielder Marouane Fellaini-a'n goal hnih khung belhin Romelu Lukaku-a'n scoresheet-ah a hming nem kai ve bawk.

Jose Mourinho hoten goal li lai khung mah se Paul Pogba inhliam an tuar tih a lang a, Palace lakah inkhel an thunun thleithei lo. Portuguese mana­ger Jose Mourinho-a'n tun season chhunga league-a goal la khung lo Eagles lakah pawh fimkhur takin substitution a siam a, player chhawr rim Nemanja Matic leh Lukaku ten an khel tluan.

Belgian striker Luka­ku hi Palace defender hmaah hun tam zawk a pil bo a, United striker hian second half-ah a chance ṭha neih hlah mah se minute li chiah a awm tawh tihin goal ruakah khungna remchang a nei a, a hlah tawh lo.

Lukaku hian league match hmasa pasarihah goal sarih a khung a, United striker hlui An­drew Cole record a tluk chiah. Belgian striker hian United kawr hain match 10 khel tawhin goal 11 a khung tawh a, Everton leh Chelsea striker hlui hian Manchester United ṭantute ngainat a hlawh tawh hle.

Crystal Palace coach Roy Hodgson chuan, "Kan khabe ah min hneksak a, kan tlu. Amaherawhchu, mu zal reng loin kan tho a, kan hnek let a, kan theihtawp kan chhuah a ni," tiin thil thlen dan thiam takin a sawi. Kum 70 mi Hodgson hian league match lia chak nei lo Dutch manager Frank de Boer a thlak a, amaherawhchu English manager pawh hian league match thumah goal a la khungtir bik lo.

Eagles hian interna­tional break zawhah October 14 khian cham­pion lai Chelsea an mikhual dawn a, an hmabak a la hautak chho hle.