Emirates Stadium-ah Laipui vawi 2 puak

Arsenal-in Premier League season bul ṭan fuh tawk lo mah se Arsene Wenger nauten September thlaah hneh loh an tawng lo a, October thlaa an match hmasa berah hnehna an chang. Nizan khan Gunners-in an mual Emirates Stadium-ah kai thar Brighton & Hove Albion chu 2-0 in an hneh.

London club Arsenal hian point 13 an hmu a, champion lai Chelsea nen an point hmuh zat an inang a, an hmelma Tottenham an phak lohna pawh point khat chauh a ni.

Tun season-ah Arsenal-in Europa League inelna an hmachhawn a, he inelna khel tawh club-ten league lamah harsatna tawk ṭhin mah se Arsene Wenger erawhin Europe inelna hi a hmang thiam - ni ruk chhunga match thum an khel chung pawhin an buai lo. French manager hian inelna ṭan hmain league a ngaih pawimawh thu a sawi a, Pathianni zan inkhelah pawh an player pawimawh Alexandre Lacazette leh Alexis Sanchez te chu inkhel bul ṭantir an ni.

Gunners-in an mualah inkhel an thunun a, Nacho Monreal-a'n minute 16-naah goal hmahruai a khung a, Spanish defender hian March 2013 hnua league-a goal a khung lehna hmasa ber a ni. Brighton-in mualneitu lakah goal venhim hna an thawk a, an innghahna chu counter attack a ni.

Arsenal-in an khelh ṭhat chu goal-ah an chantir a, minute 56-naah goal mawi an khung. Arsenal midfielder Aaron Ramsey leh forward Alexandre Lacazette te nalh taka ball an inpek kual hnuah Alexis Sanchez-a'n changin Chilean forward hian kheng letin Alex Iwobi chuan chiang zetin a pet goal.

Gunners hian Liverpool laka an mualpho hnuah Chelsea an draw tih loh chu an khingpui an hneh vek a, season ṭan hmaa contract pawtsei Arsene Wenger sawiselna hriat tur a awm tawh rih lo.