Savun Hampuar tlangzarh a ni
Mizoram football chanchin ziahna lehkhabu, Vanglaini sports columnist John Zothansanga'n sapṭawnga a ziah 'Savun Hampuar: The Mizoram Football Story' tih chu Zirtawpni zan khan Lammualah MFA honorary secretary Lalnghinglova Hmar (Tetea Hmar) chuan a tlangzarh.
Savun Hampuar tlangzarhtu Tetea Hmar chuan, "Football-a kan hmasawnnain hnamdangte ngaihtuah leh ngaihven a hlawh ṭan a, chumi avang chuan khual ṭha kan nei fo. He lehkhabu hmang hian kan football zinkawng ngaihventuten kan zinkawng ngaihnawm an hria ang a, Mizoram mai ni lo, state pawn leh India ram pawn thleng pawha kan hlawhtlinna chhiar theiha a awm tur hi ka lawm a ni," a ti.
A chhung thu
Mizoram football chanchin ziahna Savun Hampuarah hian Mizoram Premier League chanchin leh MPL hlawhtlinna tura mi inpe ten sum leh tha an sen dan, Santosh Trophy-a Mizoram sulhnu leh 2014-a an champion dan zinkawng ngaihnawm, Mizo legend S. Malsawmtluanga'n football professionalism lama Mizo te tana kawng a sah en dan leh Indian football-a Mizo ten record kan siamte tarlan a ni.
Hei bakah hian I League-a Aizawl FC sulhnu bihchianna leh record an siam dante, Indian football barakhaiha I League nomawi an chawi dan ngaihnawm, pre match leh post match conference-a titi ngaihnawm thlengin ziah lan a ni.
Eng nge an sawi?
Mihir Vasavda, Indian Express-a senior correspondent leh Indian football ziak ṭhintu chuan, "Mizo football chanchin kan chhiar dawn a nih chuan he lehkhabu hi chhiar tur chu a ni," tiin Savun Hampuar a fak.
Indian sports website lar The Fan Garage-a senior reporter Chiranjit Ojha chuan, "Mizoram football ṭhan dan chanchin leh Indian football-a thawnthu ngaihnawm thlentu chungchang ngaihnawm taka ziahna a ni," tiin a sawi.
Feverpitch.in editor-in-chief Babua Biswas chuan, "He lehkhabu ka chhiar khan Mizoram football-a cheng ve ang maiah ka inngai," a ti.
India international striker Jeje Lalpekhlua chuan, "Mizoram football zinkawng ngaihnawm taka ziahna, Mizoramin tun dinhmun kan thlen theihna tura harsatna leh buaina kan hmachhawnte hriat theihna remchang lehkhabu a ni," tiin Savun Hampuar chungchang a sawi ve bawk.
Zawrh chhuahna
Savun Hampuar hi Aizawl khawpui chhung dawr hrang hrangah zawrhchhuah nghal a ni a, MPL khelh a nih apiangin Lammualah lei tur a awm bawk ang. Lehkhabu man zat hi Rs. 250 niin a hnuaia lehkhabu dawrah te hian lei theihin chhawpchhuah a ni.
RL Nutei Book Store, Bara Bazar
Zomi Book Agency, Bara Bazar
Bookland, Bara Bazar
El Pee Book Store, Bara Bazar
Lianchhungi Book Store, Bara Bazar
Vanglaini Office, Zarkawt
Vanglaini Newsroom, Aizawl Venglai
Samuel Enterprise, Kolasib Diakkawn