Hunthar hnehin Maubawk champion

Mizoram Volleyball Association buatsaih Mizoram Cooperative Apex Bank Ltd. Inter Village Volleyball Tournament chu Inrinni zan khan R. Dengṭhuama Indoor Stadium-ah khelh zawh a ni a, mipa inelna huangah Maubawk chuan Hunthar 3-1 a hnehin an champion.

Mipa final khelh hma hian Pro Volleyball League champion Hunthar chu rinkai an ni a, court chhungah erawh Maubawk an chesual duh lo thung. Tualchhung player nei ṭha Maubawk hian 25-17, 18-25, 25-20, 25-20 in hnehna an chang. Match hmasa lama Hlimen, Khawhai leh Armed Veng South hnehtu Maubawk hi tun inelna bikah chuan team ṭha ber an ni.

Veng leh veng inelna lianah hian hmeichhe pual inelna buatsaih a ni bawk a, final inhnehtawk takah Kolasib Diakkawn chuan Dawrpui Vengthar lakah 15-25, 24-26, 25-22, 25-22, 15-2 (3-2) a hnehna changin nomawi an chawi ve bawk.

Hmeichhe Team champion Kolasib Diakkawn VC team hian pakhatna ni tura an zin kawngah hian Muanna Veng, Kanan Veng leh Armed Veng South te an hneh a ni.

Lawmman

Mipa champion : Rs 60000

Pahnihna : Rs 30000

Hmeichhe champion : Rs 30000

Pahnihna : 15000