Tualchhung football transfer hun

Mizoram Football Asso­ciation hnuaia transfer hun vawi hnihna chu hawn a ni leh ta. October thla chhung hian transfer eng chi pawh tih theih a ni a, District FA lamah pawh transfer hun inang vek hman a ni.

Kum 2015 khan MFA, District FA leh MPL club hruaitute kal khawm chuan MFA hnuaia mi zawng zawngin transfer hun thuhmun hman a rel a, he thurel ang hian 2016 aṭang khan hei hi kalphunga neih a ni tawh. Kum tinin June leh October chhung hian transfer hun hawn a ni a, he hunah hian player duh zat zat lakluh theih a ni.

Transfer hun loah hi chuan kum tluanin loan hmangin pla­yer pali lakluh theih a ni a, tualchhung leh state pawna inziaklut pahnih ve ve a huam a, amaherawhchu loan hmang­in 'free man' a lak theih loh thung.

Tualchhung tih hian Mizoram chhunga in­ziak­lut tihna a ni a, hei vang hian state pawna khel mek Mizo player-te hi chu state pawn zingah an awm thung.

October thla transfer-ah hi chuan loan hman a ngai lo a, free man tan pawh inziahluhna remchang a ni. Chutihrualin district danga player la tur chuan Inter District Transfer form District FA kaltlangin a la tur a ni.