Spurs mawina Harry GOAL
August-a goal a khung miah loh hnuah September a thlen meuh chuan Harry Kane-a'n a hna berah goal khung a nei leh tawh a, 4-0 a Huddersfield Town an sawpna inkhelah goal hnih ngawt a khung leh ta - September-a goal 13 a khungna a ni ta a, thla khatah hetiang zata goal tam a la khung ngai lo.
Harry Kane-a'n thla khata goal 13 a khung tling hian khawvel huapa player langsar bera chhal ngam pahnih Lionel Messi leh Cristiano Ronaldo te record a nih rual tel nghal - a nep lo hle.
Messi hian March 2012 khan goal 13 a khung a, thla khatah hei aia tam goal a la khung bik lo. Ronaldo-a'n October 2010 khan goal 13 a khung ve bawk - mi ropuite huangah Kane hming lam tel a ni ṭhin tawh ang.
A hming chu Kane
Kane-a'n goal hmasa ber khung turin minute 10 bak hun a mamawh lo - Kieran Trippier-a ball tauh chu Huddersfield khelmualah a tlan luhpui a, Premier League kaithar keeper Jonas Lossl tan dan theih a ni lo. Minute ruk a liam chauh a, Spurs bawkin goal an khung - Kane, Dele Alli leh Christian Eriksen ten mawi zeta ball an inpek kual hnuah Ben Davies keah ball a tla a, goal-a chantir turin harsatna a nei lo.
Spurs an phur chhunzawm a, Kane bawk a inlar chhunzawm. English striker hian minute 23-naah Danish keeper Lossl tana dan ngaihna awm loin goal hnihna a khung - chawlhlawk hman a nih hnuah Spurs-in goal dang an neih chhunzawm lawk lo a, hun pek belhah substitute Moussa Sissoko chuan chak nemnghehna goal a khung. Huddersfield-in hun ṭha nei lo tawp an ni bik lo a, Laurent Depoitre chuan crossbar a pet per a, Tommy Smith-a shot
ṭha zet chu Hugo Lloris chuan a dan sak bawk.
Mihlim Kane
Spurs striker Kane chuan, "A nuam ka ti a, ka hlim takzet. Ka ṭhianten ball ṭha tak tak min pe a, cross ball leh through ball duhawm tak min pek ṭhin avangin ka tan chuan hna a harsa tawh lo a ni," tiin a ṭhiante vanga goal khung hnem ṭhin a nih thu a sawi.
Kane chuan sawi chhunzawmin, "Hnehna kan chan avangin ka lawm a, kan team tan chuan kar duhawm tak a ni. International break-in min hmuak a, a hnu lamah pawh kan khelh ṭhat hi kan chhawm nun zel a ṭul ang," a ti a, a mimal chet ṭhat sawi zuiin, "August thlaa goal ka khung loh ngaihtuah phei chuan tuna ka khelh dan hian minti lawm hle," a ti.
Pochettino thukhawchang
Tottenham Hotspur manager Mauricio Pochettino chuan, "Hnehna chan kan phu a, team ṭha zawk kan ni. Vawiina kan inhmachhawn hma kha chuan Huddersfield hian goal thum chiah an chhuah a, goal li kan khung thei a ni. Game kha kan thunun a, kha vang tak khan ka player te zawng zawng chungah ka lawm a ni," a ti.
Argentine manager chuan sawi chhunzawmin, "Cyprus-ah Champions League khela kan zinchhuah avangin kan chau a, chutichunga kan phurna leh thawhrimna kha ropui tak a ni," a ti a, a goal khung khawl Kane fak nghalin, "Kane hian hun duhawm tak a hmang mek a ni. Goal a khung reng mai a, a thatho rengna hi a ropui lai chu a ni. Hetianga ṭha hian a khelh reng ka beisei a, hnehna min chanpui zel ka duh a ni," tiin a striker khelh danah a lawm hle.
Inkhel Chhehvel
• Huddersfield-in Spurs an hmachhawn hmain Premier League match rukah goal thum chiah an chhuah a, Spurs lakah goal li an chhuah thung.
• Spurs tan kum 1960-61 hnua league match-a khualmuala match li chhung an chak zawn vawi khatna a ni - 1960-61 season-a an record khum tur erawh chuan match li dang khualmualah an chak zawn a la ngai thung.
• Tottenham-in khualmuala Premier League match an khelh hnuhnung parukah goal 25 an khung a, match khata 4.2 zel goal khung ang an ni.
• Mauricio Pochettino-a'n Spurs a enkawl hnuah (2014-15) Tottenham aia kai thar team laka point hmu hnem an la awm lo (58).
• Kane-a'n Premier League-a club 26-a hmachhawn tawhah club 25 lakah goal a khung a, Cardiff City (two apps, 0 goals) lakah chiah a la khung lo.
• Kane kha Premier League player zingah khualmualah a zawna match thum chhung goal hnih khung tling thei pahnihna a ni a, 1997 khan Dennis Bergkamp chuan he record hi a lo siam tawh.
• Trippier-a'n Premier League-ah assist pakua a nei a, chumi zinga paruk chu Kane tana a siamsak niin khualmualah vek a ni.