BVT lakah Chanmari him hram

Zirtawpni zan Mizoram Pre­mier League Season 6 inkhel­ah goal a lut lo. Bethlehem Veng­thlang FC leh Chanmari FC ten point khat ve ve an hlawh chhuak.

Lammual inkhel hmuhnawm takah Chanmarians keeper F. Lalmuanawma'n penalty a dan bakah save ṭha tak tak nei bawkin man of the match a thlan a ni. Chanmari FC hian point 11 hmuin pahnihna an ni a, BVT hian point 9 hmuin pathumnaa awm Aizawl FC nen an point hmuh zat a inang chiah.

Goal awm lo mah se...

Bethlehem Vengthlang FC-in hnehna chan tumin inkhel bul an ṭan a, technical area-ah coach Chawngthansanga a ṭhut leh tawh avangin Chanmari FC lakah an inringtawk hle.

BVT tan Vanlalthanga ke vei lam chu hmanraw pawimawh a ni a, Hualngohmun tlangval ball pet chu Chanmari keeper Muanawma tan hna a tling.

Chanmari defender handball vanga an penalty hmuh chu BVT captain Lalrammawia'n petin keeper Muanawma'n a dan sak. First half-ah BVT an chungnung zawk a, Chanmari coach H. Van­lalthlanga'n hun chanve hman zawh hmain Lalmuanzova dahlut mah se a danglamna hmu turin hun a awm tawh lo.

Second half-ah inkhel hmuh­nawm tak hmuh chhunzawm a ni a, BVT vanneih zan a ni lo. Chanmari keeper Muanawma a che ṭha chhunzawm a, BVT tlarhma finishing a tawih tawk lo. VL Thanga'n hnai tak aṭangin a khung lo a, Chawngthansanga hote an khelh dan thlirin point thum hmu tur ni mah se goal an khung thei tlat lo.

Chanmari lam bet zawk mah se chance ṭha bik erawh an insiam tho; Alex Whittemore leh Muanzova ten goal theihna turah goal an khung lo a, Liberian forward-in MPL-ah goal a la khung lo.

A ngaihnawm dawn

Bethlehem Vengthlang FC-in September 26, Thawhlehni zanah Aizawl FC an hmachhawn dawn a, an point hmuh zat a inan avangin inkhel pawimawh tak a ni dawn. Tlai lamah Chanmari Derby a awm dawn a, Chanmari leh West Warrior inkhel result hi table chunglam nghawng pha tur a ni.

Thawhlehnia inlan tur BVT, Chanmari FC, Aizawl FC leh Chanmari West te hi season liam taa semifinal lut pha te an ni a, kuminah erawh Chhinga Vengin hma an hruai mek avangin team pali hi knockout stage-ah kan hmuh nawn hmel loh. Phase 1 kharna inkhel hi a hmuhnawm dawn a, hemi zawh hian Lungleiah MPL6 round 8 khar a ni dawn a, tualchhung football boruak a sang chho zel ang.