Hamilton hnehin Verstappen a chak

Nimin tlaia tlan For­mula 1 Malaysian Grand Prix-ah Red Bull driver Max Verstappen chuan championship hma­hruaitu Lewis Hamilton hnehin pakhatna a ni - Mercedes driver Hamil­ton hi pahnihnaah a thleng.

World champion vawi li ni tawh Sebastian Vettel chu qualifying lamah engine buaina a neih avang­in a hnunglam aṭang­in bul a ṭan a, Ferrari driver hian beisei phak baka ṭhaa rawn tlanin Valtteri Bottas hmaah a thleng thei a - palina dinhmun a luah phak. Nomawi a beiseina kawngah Hamilton kal filawr lutuk tur a tiziaawm.

German tlangval Vettel hian point 34-in Hamilton a phak lo mek a, tun season-ah intlansiak hmabak panga chiah a awm tawh a, point hmuh theih 125 a la awm tihna a ni. October 8 khian Japan lamah an intlansiak leh ang. World champion vawi thum ni tawh Hamilton hi a chesual hle a nih loh chuan Vettel-a nihrualin vawi li a champion thei ang.

Force India pawhin a tikimtu an ni satliah lo tih an lantir chhunzawm zel, Sergio Perez chu parukna niin a teammate Esteban Ozon pawh 10-naah a thleng ve bawk.

Hnehna changtu Ver­stappen chuan, "Intlan­siaktir lam khan ka car kha a ṭha hle a, a hnuah harsatna lian lo erawh ka tawk. Lewis pawhin buaina a nei ve tho a ka hriat avangin ka chiai duh lo a, ka duh ang taka tlanin hnehna ka chang thei a ni," tiin a sawi.

Hamilton chuan, "Max khan hnehna chan phuin a tlan a, ka lawmpui hle a ni. Intlansiak nuam leh hautak a ni a, tun ṭum chu a nawrtu zawkah kan ṭang. Car enfiah nawn a ngai dawn a, inelna neih leh hunah chuan midangin min um ve tawh thung ka beisei," tiin Japan-ah chuan pakhatna nih a inbeisei hle.