PSG tan Neymar-a'n penalty a pet Paris club-in goal khung an harsat lo

Khawvel footballer manto ber Neymar chuan Inrinni zan khan Paris St Germain tan goal hnih a khung a, goal hnuhnung zawk hi penalty aṭanga a chhuih luh a ni. Ligue 1 hmahruaitu PSG hian an mikhual Bordeaux 6-2 in an sawp a, inkhel dangah champion lai AS Monaco leh Montpellier te chu 1-1 in an inhnehtawk thung.

Paris-a inkhelah pound mak­ta­duai 200 man Neymar-a'n minute ngana lekah freekick aṭangin goal hmahruai a khung a, Edinson Cavani leh Thomas Meunier ten goal an khung belh hnuah PSG hian penalty an hmu.

Brazil captain Neymar leh Uruguay international Cavani ten Lyon an hneh ṭumin freekick leh penalty pet an inchuh a, star player pahnihin buaina an neih hnua penalty an hmuh lehna hmasa ber a ni. Lyon nena an inkhelh hnu lawkah PSG manager Unai Emery-a'n Cavani hi penalty pet tur a nih thu sawi set tawh mah se Bordeaux lakah erawh Neymar pettir a ni.

Barcelona forward hlui Neymar hian a hun ṭha neih a hlah lo a, chiang zetin a goal hnihna a chhuih lut. PSG-in an la duhtawk mai lo, rawlthar duhawm Kylian Mbappe-a'n Germany international midfielder Julian Draxler goal khung tur a siamsak bakah France international hian an goal rukna a khung bawk.

Kum 18 mi Mbappe chuan, "Khawvel player ṭha pahnih Neymar leh Cavani te nena khelh chu a nuam hle, kan la awm­­khawm rei lo a, inman tawk lohna lai erawh kan la nei. Player ṭha an nih avangin ka tan pawh insiamrem a harsa lo a, eng tiangin nge rang taka ball kan inpek kual theih ang tih chu a pawimawh hmasa a ni," a ti. Season hmasa Monaco champion puitu Mbappe hian loan hmangin PSG a zawm a, a loan hun a zawh hnuah Paris club hian a nghetin an lalut ang.

PSG hian league match riat an khelh aṭangin point 22 an hmu a, hmahruaitu an ni. Season hmasa lama an tluk loh Monaco chu vawi khat an chak loh bakah a ṭum khat nan an khingpuite nen an inhnehtawk avangin an inkarah point thum a awm tawh.

Inkhel dangah Monaco tan striker rinrawl Radamel Falcao-a'n chawlhlawk hmain goal khung mah se hun tawp dawnah an goal an venghim zo lo, hun pek belhah Souleymane Camara chuan Kevin Berigaud hnen aṭanga a ball hmuh chu goal-ah chantirin an siphurh a zut a ni.

A la tawk lo

Spanish manager Emery-a'n Champions League-ah German champion Bayern Munich lakah a naute si thum faiin hnehna a chan pui zawh hnu lawkah goal ruk an khung zui thei a, heti chung hian hmasawnna tur an la neih bakah goal venhim lam an zir belh a ngaih thu a sawi chhuak.

Sevilla manager hlui Emery chuan, "Kan ṭha tawk tawh tia sawi ngawt theih a la ni lo, ka naute khelh danah ka lawm a, kan result leh point thum kan hmu hi chanchin ṭha a ni. Goal ruk kan khung avang khan kan tlarhma a hriam tih a chiang a, mah se goal hnih kan chhuah avangin zir tur kan nei," tiin tlarhnung lam inenfiah a ṭul thu a sawi.

PSG manager chuan sawi zawmin, "Kan khingpui ten an khel ṭha em em a, an tlarhma an hlauhawm hle tih chu ka hmuh hmaih lo, khatiang dan theih dan tur kha kan ngaihtuah a ngai. Player ṭha kan ngah a, result thlak danglam thei kan neih avangin hnehna kan chang, inchhuang tur erawh kan ni bik lo," tiin goal ruk khung chunga goal hnih an chhuah chu pawi a ti hle.