Swansea hnehtu Bilic a lawm

West Ham boss Slaven Bilic chuan Pre­mier League-a 1-0 a Swansea City an hneh hnu lawkah a thawk huai thu a sawi. London Stadium-a inkhelah hian Bilic-a nauten beisei an phak loh avangin fan-ten an lungawi lohna an lantir hman hial. Mahse, minute 90-a nihin Sakho-a'n goal a khung a, Swans tan sut letna hun a awm tawh lo.

Bilic chuan, "Point thum kan hlawh chhuak a, hahdam takin ka awm ve ta. Fan-te thlawpna ṭha hmu reng tur chuan keini lam pawhin tih tur kan nei ve a, minute tinah ṭha taka kan khelhchhuah a ngai. Mahse, chu chu first half-ah kan ti lo a, bench aṭanga tlan lut ka player-te khan team leh mipui min chawk phur a ni," tiin substitution an siam fuh thu a sawi.

Croatian manager sawi ang ngeiin Ham­mers game thlaktu hi substitution a ni. Bilic-a'n Javier Hernandez leh Andre Aywe lachhuaka Masuaku leh Sakho a luhtir laiin fans lam aṭangin auh elna hial awm mah se Bilic-a'n thutlukna a siam sual lo a, a tawpah hnehna a chanpui.

Bilic hian Masuaku leh Sakho a luhtir hma hian Lanzini chu bench aṭangin a luhtir bawk a, kum 49 mi manager chuan Lanzini pawh fakin, "First half-ah khan attacking game kan khel a, mah se tlarhnung leh tlarhma kha an inpui ṭha tawk lo. Khamiah tak khan Lanzini khan danglamna a rawn thlen a ni," tiin a player a fak