Foreign player tel lohna 2nd Div League
All India Football Federation chuan chuan I League Second Division-ah foreign player neih an phal dawn lo. 2nd Division League hi 2017-18 season atan chuan nakkum March - May inkarah khelh a ni dawn a, Indian FA chuan State FA-te chu an hnuaia club zinga 2nd Division khelh duh chu October 4 hmaa nominate turin an hriattir tawh.
Second division league-ah hian AIFF chuan team 20 tal neih tumin hma a la mek a, Indian Super League club ten an reserve team khelhtir dawn mah se ISL club reserve team te chu knockout format hmanga khelh tur inelnaah hian final round-a an inlan ve phalsak an ni dawn lo.
Indian FA chuan club-te chu foreign player chhawr an phal dawn lo a, club-te chuan squad-ah player kum 23 aia upa pathum bak an kawl a thiang dawn lo. Hei hi AIFF-in player naupang zawkten chance tam zawk an neih theih nana an ruahman a ni.
AIFF official chuan, "Tun season atan chuan I League Second Division-a foreign player neih hi kan duh lo. He thutlukna kan siam chhan chu club-ten Indian player leina kawngah fing taka sum an hman theih nan te, youth system-in hma a sawn theih nana hmalakna kan neih theih nan te a ni," tiin an thutlukna chungchang a sawi.