Augsburg laka vannei inti Dortmund boss

Inrinni zan Bundesliga inkhelah Borussia Dort­mund chuan an mikhualna ramah 2-1 in Augsburg hneh mah se Dortmund coach Peter Bosz chuan a naute khelh danah a lawm loh thu leh German club a enkawl hnua an khelh chhiat ber ṭum a nih thu a sawi.

Augsburg khelmualah hian Dortmund tan Andriy Yarmolenko leh Shinji Kagawa te chuan goal khat ve ve an khung a, striker Pierre-Emerick Aubameyang chuan chance ṭha vawi tam a hlah hnuah penalty a hlah bawk - panenka hmanga pet a tum a, a mualphona belhchhahtu mai a ni. Augusburg goal neihchhun hi Caiuby khung a ni thung.

Tun season aṭanga Dortmund enkawl ṭantu Bosz chuan, "Dortmund ka zawm hnua kan game chhiat ber ṭum a ni a, chutichunga hnehna kan chang thei erawh ka lawm takzet. Khatiang taka game chhia kha chu season khatah vawi hnih tal hi chu kan tawng ṭhin a, kan tlawm tlangpui bawk. Keini erawh kan khelh chhiat

ṭumin hnehna kan chang a, kan vannei a ni," a ti.

Dortmund tan Mario Gotze chu bench-ah dah a ni a, Bosz chuan Germany international a awl tir chhan sawiin, "Mario khan inkhelh a chak ang tih ka hria a, mah se chhawr rih lo a fuh zawkin ka hria a ni. Kar khata match thum khelh chu a tan a la tam mah mah," a ti.

German club hian Champions League lam­ah match hnih khel tawhin tlawm ve ve mah se Bundesliga lamah erawh hmahruaitu an nih chhunzawm zel - league match sarih an khelh tawhah vawi ruk chakin vawi khat an khingpui an inhnehtawkpui a, tlawm hmel an la hmu miah lo.

Augsburg laka goal an chhuah khan tun season league match-a goal an chhuah vawi hnihna chiah a ni.