Atletico khelh danah Simeone a lawm lo

Inrinni zan khan Atletico Madrid chuan khualmualah Leganes an lenchilh a, goal khung loin an inhnehtawkpui - Atletico hian La Liga match an khelh hma hian Champions League-ah Chelsea chu 2-1 in an ngam lo a, draw result an hlawhchhuah chhunzawm avangin manager Diego Simeone a lawm lo.

Argentine manager chuan, "Inkhel ṭantir minute 15 aṭanga 20 thleng kha chu kan khelh dan tur angin kan khel tawk lo. Goal khung theihna remchang pawh kan nei ngei a, mah se kan hun ṭha neih kan chhawr theih loh hnuah kha chuan ngai kan awh leh tawh lo. Nilaini zanah Champions League kan khelh avangin ka naute an chau a ni," a ti.

Simeone chuan a goalkeeper Jan Oblak fak chhunzawmin, "A chang kha chuan awmze nei lo leh fimkhur lo takin kan nawr leh chiam ṭhin a, khami vang khan counter attacking hmangin hun ṭha an nei fo. Mahse, kan si ban nghaktu kha Oblak a ni a, ani khan min chhanhim ṭhin a ni," a ti a, a keeper avanga point khat hmu thei an nih thu a sawi.

He inkhelah hian Atletico tan Antoine Griezmann inlan mah se an player chhuanvawr hian tun season-a a vawi khat nan goal zawnah a pet miah lo!