Juve tan nghah rih a la ngai

Juventus chuan Serie A nomawi chawi theihna hun ṭha an neih an bawhpelh a, match khat dang an nghah leh rih a la ngai dawn. Old Lady hian Pathianni zan dar 1:15-ah Sampdoria an mikhual dawn a, an chak chuan anmahni mualah ngei champion an lawm thei dawn.

Ningani zan inkhelah Juve hi table mawng lama talbuai Udinese mualah 2-1 in an tlawm. Inkhel dangah Lazio chuan Cagliari 2-1 a hnehin Champions League an khel dawn chiang tih an nemnghet ve nghal bawk. Italian Serie A aṭang hian Juventus, Atalanta, Inter Milan leh Lazio te chu UCL atan an tling chiang tawh. AS Roma leh AC Milan te chu Europa League khel thei china awmin, pasarihna Napoli chu Coppa Italia champion an nih avangin Europe-ah an inlan dawn tih a chiang.

An elpui dangte an chesual tih hre sain Juventus chu Udinese mualah an leng lut, hnehna chang ni se chuan match pathum khelh hmabak nei chungin an champion tih a chiang dawn. Mahse beisei leh rinlawk ang ngawtin thil a kal thei bik lo.

Turin club hian chawlhlawk hma deuhin defender Matthijs de Ligt hmangin goal hmahruai an khung. Second half-ah Udinese tan Ilija Nestorovski-a'n si phurh a sut hnuah hun tawp hma deuhin Seko Fofana chuan chakna goal a khung.

Cristiano Ronaldo leh Paulo Dybala te minute 90 chhung an inkawp a, hun ṭha insiam zeuh zeuh mah se an vannei lo. League goal 30 khung tawh Ronaldo-a'n top scorer dinhmun luah tur chuan khelh hmabakah goal a khung belh ngei a ngai dawn.

Covid-19 vanga inkharkhipna kalpui a nih lai khan Juve leh Lazio inthlauhna chu point khat chauh a ni. Maurizio Sarri naute hian tun hnaiah point an hloh hnem, an league match hnuhnung pangaah phei chuan vawi khat chiah chak ni hmel an hmu.

Mahse, an hnuaia awm leh anmahni umtu Atalanta, Inter Milan leh Lazio ten point an hmuh belh hleithei bik lo. Italian manager Sarri-a'n harsatna hrang hrang leng karah a vawi khat nan league nomawi a chawi ngei dawn tia sawi ngam a ni ta.

Sarri chuan, "Point thum hmuh kan tum a, chumi tur pawh chuan kan theihtawp kan chhuah. Mahse minute 93-naah goal kan chhuah lawi si, goal chhuah tlai kha chhuanlam a tling lo. A hma lam zawngah khan goal khung belh ni ila hetiang hi a thleng lo ang," a ti, a naute khelh danah a lawm hran lo.

Serie A nomawi chawi tur, Champions League khel tur leh Europa League lama inlan tur a chiang kim thawkhat tawh. Golden Boot dawng tur erawh a la chiang thei lo, goal 31 khung tawh Ciro Immobile leh Ronaldo (30 goals) an inhnaih hle.

Italian forward Immobile hian Ningani zan khan Cagliari lakah chakna goal a khung, a elpui Ronaldo nen an goal khung inzat chu goal khatin a kalpel leh rih - match khelh hmabak pathum an la nei. Player pahnih hi penalty aṭanga an khung zat pawh a inang, penalty aṭangin goal 12 ve ve an khung.

Immobile chuan, "Match thum khelh hmabak nei chungin UCL ticket kan nei fel thei hi a lawmawm, mimal lawmman leh hmingṭhatna chu a pawimawh ber a ni lo a, result ṭha kan nei a nih chuan hetiang thil hi chu thleng tur mai chauh a ni zawk," a ti.