Marquez a intlansiak dawn!

A ban ruh tliak an zai aṭanga ni hnih hnu lekah Marc Marquez chu MotoGP huanga kir leh turin a dam tih puan a ni. Pathianni zan dar 5:30-a tlan tur Andalucia MotoGP-ah a inlan theih ngei rin a ni.

Kar hmasaa tlan zawh tak Spanish Grand Prix-ah khan Marquez bakah Cal Crutchlow (banrek) leh Alex Rins (dar) ten hliam an tuar a, anni pathum hi Ningani khan an dinhmun endik leh niin practice nei thei turin an dam tih an puang.

World champion Marquez hi Thawhlehni khan Barcelona-ah zai a ni a, amah zaitu leh a team Repsol Honda chuan a lo kir leh thuai ring mah se tun kar tawpah hi chuan a inlan hman an beisei lo - an rin leh beisei aia hmain a intlansiak dawn tihna a ni.

Covid-19 vangin MotoGP hi an hun ruahman sa angin an tlan thei lo. Jerez tlan kawnga inelna pahnih an neih hnu hian Czech Republic-ah an kal ang a, chumi hnuah Austrian leh Styria GP tlan turin Red Bull Ring-ah an lut ang.

Season dang angin ram hrang hrang an ruahmannaah tlan kim vek thei dawn lo mah se inelna a tam thei ang ber neih an tum, inelna buatsaihtu lam chuan intlansiak an neih tur zinga 13 chu a hun leh hmun an ti fel tawh.