Arsenal lakah Spurs an zawr!
Premier League hmahruaitu chu a ngai Arsenal bawk an ni. Gunners hian an hmelma, season hmasa lama an chunga awm Tottenham Hotspur chu 3-1 in an hneh a, table chung berah an dinhmun an sawhnghet.
Arsenal manager Mikel Arteta chuan a naute chu hnehna chan châkin an tuihal thu a sawi zui a, player naupang rual tak enkawl chungin Spanish manager hian eng chen nge a thlen theih dawn chu kan hre thuai ang - an hmabak chu Liverpool an ni dawn.
Laipui a puak
Inrinni tlai Emirates Stadium-a inkhelah hliam damkawr Thomas Partey-a'n inkhel bul a ṭan - Gunners fans lam an thlamuang nghal phawt. Partey hian Ben White-a ball pek chu yard 25-a hla aṭangin a pet kual lut.
Antonio Conte nauten goal ven an ngai pawimawh a, tlarhnunga defender intlar phui tlat su hawng thei lo mah se box pawn aṭangin goal mawi an khung, keeper Hugo Lloris tan dan ngaihna a awm lo.
Tottenham lamin counter attack aṭangin an vaw let ṭhin. Forward Son Heung-min tal put a hlauhawm a, an ven hneh loh bakah Arsenal an insiamrem nghal mai lo. Richarlison chuan penalty hlawhin Harry Kane-a'n si phurh sut nan a hmang.
Second hlaf tirah khel ṭha tak Gabriel Jesus hun a inher chhuak. Bukayo Saka-a shot na tak chu Lloris chuan a man bet zo lo, a hmun dika awm Jesus chu lo laksak nghalin 2-1 a hmahruaina goal a khung - Thierry Henry angin 'Knee Slide' hmangin goal a lawm.
Emerson Royal-a'n Gabriel Martinelli a tlawh vangin red card pek a ni a, Brazilian forward Martinelli hi a hliam na lo hlauh. A hnuah hlauhawm taka ball a lakluh chu Granit Xhaka-a'n a lo la chhawng, Swiss midfielder hian chak nemnghehna goal a khung.
Spurs an tlawm
Tottenham lamin chhuanlam atan Emerson hnawhchhuah kha an hmang mai thei, mahse chhuanlam a tling lo ang - chiang takin Martinelli a tlawh miau a, hrem a phu. Mual sir aṭanga lo entu Conte erawh a player an hrem vangin a lawm lo.
Tun season EPL bika an tlawm vawi khatna a ni a, striker ṭha bik Kane-a'n khualmualah goal 100 a khung tling, hetiang ti thei hmasa ber a ni. Richarlison a hlauhawm a, a tir lama a khung tur Arsenal keeper Aaron Ramsdale-a'n a lo dang hram.
North London derby bikah erawh Spurs hian an ṭhat tawk lohna lai an hmu chiang ang, midfielder zingah ball keng thei an nei meuh lo. Tlarhnung an nghet lo a, a sir chauh ni loin a laiah pawh a phui lo - Conte tan tlarhnung siamrem chu hna hmasa a ni ang.
Conte chuan, "A tirah striker pathum - Kane, Son leh Richarlison kan hmang, Ivan Perisic pawh goal nawr chi a ni. Hmatawng kan dah hnem a, chumi kara red card kan hmuh bakah 2-1 a ni bawk si, a harsa tawh a ni," tiin a sawi.
Kawng dik zawh
Arsenal manager Arteta chuan, "Kan khingpui khan thil hlauhawm tak tih an nei lo, khatiang khawpa inkhel kan thunun thei kha a lawmawm hle. Kan tih turah kan chiang em em vek a, kawng dik kan zawh mek a ni," a ti.
Arsene Wenger chhuah hnuah Gunners hian khelh dan phung nghet an nei hleithei lo. Arteta an neih hnuah erawh kalphung an nei leh ta, nipui bazarah an duh zawng player an lak bawk avangin beisei an nei sang hi a mak hran lo.
William Saliba chu tlarhnung laia an kulhpui a ni a, a sirah ball thiam Oleksandr Zinchenko a awm thei leh tawh. Ben White a awm hnuah a sir lam aṭanga ball hlauhawm lo kal ṭhin kha a tlem, a nawr lam pui na tawk lo mah se a venhim lamah a thawh hlawk.
Liverpool an hmachhawn hmain Europa League an khel dawn a, manager Arteta-a'n league lama a chhawr rim loh a hman a ngai ang. October thla chhungin match khelh hmabak pariat an la nei, an squad a chhah tawk em, tih fiah a ni dawn.