Chelsea lawmna thlentu Gallagher

Selhurst Park-ah Conor Gallagher-a'n minute 90-naah Chelsea chakna goal a khung a, loan-a a khelhna ṭhin Crystal Palace laka a khung avangin a goal khung hi a lawm lo. Blues ṭantute erawh Gallagher goal vangin an lawm hle.

Inrinni zan inkhelah hian Jordan Ayew cross chu minute sarihna lekah Odsonne Edouard-a'n a tlawh goal a, Palace ṭantute an phur.

Patrick Vieira hote an phur chhunzawm a, box pawn aṭanga Eberechi Eze ball pet chu keeper Kepa Arrizabalaga-a'n ṭha takin a dang.

Chlelsea an insiamrem a, Mason Mount leh Raheem Sterling ten hun ṭha an hlah. Pierre-Emerick Aubameyang erawhin a hun ṭha neih a hlah ve lo - minute 38-naah Auba hian box chhungah mawi zetin a volley goal.

Team pahnih inhnehtawk thei dinhmunah an ding a, hun tawp hma hreta danglamna thlentu chu Gallagher a ni. Chelsea midfielder Gallagher hian box pawn aṭangin goal kilah a dah.

Coach thar Graham Potter hnuaia Chelsea chak hmasa ber a ni a, Auba leh Gallagher ten club tana an goal hmasa ber an khung bawk. Potter hian keeper-ah Kepa Arrizabalaga a chhawr a, Spanish keeper hian a khelh dan thlirin bul ṭan zel a la phu.

Edouard Mendy, N’Golo Kante leh Marc Cucurella te an khel thei lo a, Potter chuan Cucurella awm loh vangin inkhelh banah defender pali a chhawr thu a sawi. Mak ang reng tak erawh bench-ah chhawr loin centre back Kalidou Koulibaly a awm.

Chelsea-in point thum hlu tak an hlawh chhuak a, Palace erawh an lawm lo. Eagles hian 1-0 a hma an hruai laiin Thiago Silva chuan tlu chungin Ayew-a ball khalh tur chu a kutin beng a, Brazilian defender hian hnawhchhuah a phu laiin referee Chris Kavanagh-a'n yellow card chauh a pe.

Palace boss Vieira chuan tiel taka a nui zawhah, "A vannei hle a ni. Referee thutlukna a ni a, VAR thutlukna a ni leh bawk. Mahse hriatthiam a har a, pawm a har hle," tiin inkhelh banah a lungawi loh thu a sawi.