Mipui ngaihven Pro Fight an khel zo

Tualchhung boxing inelna lian Tata Yodha 4x4 LPS Pro Fight 2022 chu Zirtawpni zan khan an khel zo. R. Dengṭhuamna Indoor Stadium-a a hmawr bawkna hi 'Dr. Zorammawia Night' tih a ni a, TV leh a hmuna entu an ṭhahnem hle.

Flyweight, Super Bantamweight, Super Featherweight, Super Lightweight leh Super Welterweight hmanga inelna neih niin, inhnek hmuhnawm an chhawp chhuak. Ruahman dan chuan season dangah pawh Pro Fight hi buatsaih leh a ni ang.

Super Bantamweight - Round 4

Lalrinngheta bt F. Zoramchhana
Split Decision (36-40, 39-37, 39-37)

Lalrinngheta'n F. Zoramchhana lehthalin Tata Yodha 4x4 LPS Pro Fight super bantamweight-ah a champion. Mizo boxer zinga hriat hlawh Zotea'n round li an inbeih chhungin nawr tluan zak mah se Tuipui boxer Rinngheta'n thiam taka inveng chhungin a hnek let a, split decision-in Cherhlun chhuanvawr a hneh - boxing zin kawng a zawh chhunga a hun ropui ber a tawng.
Kum 23 mi Zotea'n panin vawi thum vawi li hnek zawn ṭhin mah se a fuh tam lo. Inhnaih chilhah hnek chhuak tam zawk ni mah se ṭha takin Rinngheta a inveng thei viau; judge pahnihin 39-37 ve vein an chaktir a, judge pakhatin round liah lehlam a chaktir vek ve thung.

Kum 20 mi Rinngheta hi a champion bakah KT Enterprise Promising Boxer lawmman a dawng tel. November-a Asian title chuh tuma inbuatsaih mek Zotea erawh a vawi hnih nan professional huangah a tlawm a, ṭum li a chak tawh thung a ni.

Super Lightweight - Round 4

Vanlalawmpuia bt HC Lalramfela
Split Decision (39-37, 39-37, 37-39)

Mipui ngaihven hlawhah Vanlalawmpuia chuan, split decision-in HC Lalramfela hnehin Tata Yodha 4x4 LPS Pro Fight super lightweight-ah a champion a, sulhnu ṭha neih belhin a tawp zan hian GIG Motors Fighter of the Night atan thlan a ni bawk.

Mizo boxer hriat hlawh pahnih hi inhnehtawk takin round li an inhnek tluan a, a tir aṭanga a tawp thlenga hnek chhuak hnem zawk Awpa'n a vei leh dinga a hnek chuah tam bakah fuh takin a dawm fo a, 2015 Pro Fight champion Ramfela'n a ding lamin fuh takin hnek fo mah se a tawp lamah a chhang let ṭha tawk lo.

Khuangthing fighter Awpa'n thahrui a ngah a, chutih laiin Chawngtlai tlangvalin inhnaih chilhah a vei lama a invenna kara a hnek bakah a ding lamin a bekah a vai zui bawk. Mahse, a tawp round hnihah a khel ṭha tawk lo. Judge pahnihin 39-37 ve vein Awpa an chaktir, judge pakhatin round thumah Ramfela a chaktir ve thung.

Flyweight - Round 4

Laldinsanga bt Samuel Lalthlamuana
Knockout (Round 3, 2:48 min)

Laldinsanga'n inhnek hmuhnawm a lantir. Dinsanga hian Samuel Lalthlamuana vawi hnih a hnek tluk hnuah a knockout. Tata Yodha 4x4 LPS Pro Fight flyweight-ah champion-in boxer ṭha bera tlan a ni bawk.

Kum 19 mi Dinsanga hian round hnih an khelh zawh hnuah hnek zawn char charin Thlamuana a tlu. Saitual rawlthar hi tho leh mah se Lunglei Ramthar boxer-in um zuiin a hnek tlu leh a, round thumna minute hnih leh second 48-ah a chak a ni.

Championship chhunga vawi li a khelhah Dinsanga hi round thum khelh zawh ngai lo vekin a chak a, semifinal aṭangin professional a luhchilh a, knockout ve vein a chak zawn.

Super Featherweight - Round 4

Lalrosangzuala bt Yuri Lalbiakdika Sanate
Majority Decision (39-37, 38-38, 39-37)

Lalrosangzuala chuan Yuri Lalbiakdika Sanate hnehin super featherweight-ah a champion. Chaltlang boxer Rosanga'n bulṭan fuh lo mah se, round hnihna aṭangin a insiamṭha a, majority decision-in Vaitin tlangval Biakdika a hneh.

Round hmasa berah kum 24 mi Biakdika a langsar zawk a, nawr chhunzawm zel mah se amah aia kum khata naupang zawk Rosanga'n chu inhnaih chilhah a che fuh zawk, a tawp lamah chiang tak taka a hnek fuh bakah round hnuhnung berah chiang takin a chak.

Rosanga hian boxing a khelh tawh china a tawn sang ber ṭum a tawng a, atan hun chhinchhuah tlak a ni. Biakdika erawh Pro Fight champion nih ngei a tumna a tihlawhtling zo lo, mahse KT Enterprise Best Challenger-a thlan a ni.

Super Welterweight - Round 4

C. Lalhruaitluanga bt Zomuansanga
Majority Decision (39-37, 36-40, 38-38)

Super welterweight-ah C. Lalhruaitluanga chuan Zomuansanga lakah inhneh thunun tak chungin hnehna a chang. Chawngtlai boxer Hruaia'n a sawi lawk ang ngeiin a hnek chhuak hnem a, thahrui fei zawk a nihna a tawp rat thlengin a lantir.

Inhnehtawk tluan zak mah se chau har zawk Hruaia'n mar takin a khel a, round thumna aṭangin Khatla South tlangval Muantea a tlahniam, a chet dan aṭangin a chau tih a lang a, hnek fuh nei zui fo mah se Hruaia kuttum a dawng hnem.

Kum 25 mi Hruaia'n professional boxing a khelh vawi ngana niin a chak vek a, champion medal leh lawmman pawisa fai cheng singnga bakah Dr Zorammawia chhungten cheng sangnga an pe a ni.

Lawmman
Champion: Rs 50,000 + Medal
(Dr Zorammawia chhungte weight pangaa champion hnenah Rs 5,000 ṭheuh an pe)
Runner-up: Rs 20,000
GIG Motors Fighter of the Night Vanlalawmpuia, Khuangthing (Rs 2,500)
KT Enterprise Best Boxer Laldinsanga, Lunglei (Panasonic Washing Machine kg 8 + Trophy)
KT Enterprise Best Challenger Yuri Lalbiakdika Sanate, Vaitin (Trophy + Rs 8,000)
KT Enterprise Promising Boxer Lalrinngheta, Tuipui (Trophy + Rs 8,000)
PC Lalnunmawia Trophy for Best Referee Lalchhanhima Hnamte, Armed Veng South (Trophy + Rs 6,000)
PC Lalnunmawia Trophy for Best Judge Lalmalsawma, Hnahthial (Trophy + Rs 6,000)