Indonesian football-ah chhiatna rapthlak!

Football khawvel chuan nimin khan chanchin lawmawm lo hriat tur a nei - Indonesian football-a chhiatna rapthlak a thlen thu a ni a, Malang, East Java-a Arema FC leh Persebaya Surabaya inkhela buaina chhuak avangin mi 174-in nunna an chân!

Kanjuruhan Stadium-a thil thlengah hian mi 180 velin hliam an tuar bawk a, he thuziak i chhiar meuh chuan thi zat hi a danglam leh tawh hial mai thei - a tirah mi 130 thi anga tarlan a ni a, mahse, hliam na tak tuar zingah thi an awm belh avangin mi 174 an tling chho.

FIFA president Gianni Infantino chuan, "Football khawvel tan chuan ni duhawm lo tawp khawk a ni a, sawifiah theih loh khawpa chhiatna runthlak a ni," tiin a sawi.

Indonesia president Joko Widodo chuan thil thlen dan chhui chian a nih hma chu Indonesian football-a top league chu tihtawp rih turin a ti a, Indonesian football association (PSSI) chuan thil thlen dan an zirchian nghal thu an sawi bawk.

Thil thlen dan
Indonesian football-a team inhal ber pawl Arema FC leh Persebaya Surabaya te chuan league match an khel a, he inkhelah hian mualneitu Arema FC chu 3-2 in an tlawm.

Mahni muala tlawm Arema ṭantuten an result an hrethiam lo a, khelmualah tlan lutin, anmahni ang thoa lungawi lo player-te chu lungawi lohna lantir kawngah puih an tum - mahse, Police an lo lang vat a, buaina a chhuak zui.

Police-te hian tear gas an hmang a, hei hian buaina tihkian aiin a ti punlun niin a lang. A hmuna thil thlen dan hmutu Muhamad Dipo Maulana chuan, "Police-ten tear gas an kap chhuak nasa a, a ri reng a, an kap rang em em bawk," a ti.

Dipo chuan, "Mipui tam tak chu tlanchhuah an tum laiin tear gas vangin an chau a, naupang leh kum upa tawh tak tak, tear gas vanga buai an tam hle," a ti a, Police chet dan a dem.

Engtin zel?
Social media lama video darh aṭanga a lan danin, fans tam tak chuan bang daidanna lawn liamin khelmual chhuahsan an tum a, fans ṭhenkhat chu che thei loin stadium chhungah an tlu nasa hle bawk.

Chief Security minister Mahfud MD chuan Kanjuruhan Stadium-ah mi 38,000 chauh leng mah se ticket 42,000 zet hralh a nih thu a sawi a, heti chung hian mikhual team Persebaya Surabaya fan-te chu buaina a chhuah hlauhthawn thilah ticket an lei phalsak a ni lo.

East Java police hotupa Nico Afinta chuan, "Engmah kha thunun theih a ni tawh lo. Police officer-te pawh an bei a, car pawh tam tak an tichhia - fans zawng zawng kha an sual ta vek tihna a ni lo, khelmuala tlan lut mi 3,000 kha a ni," tiin fans tlemte vanga buaina thleng a nih thu a sawi.

Nico Afinta chuan mitthi zingah Police pahnih an tel thu a sawi a, Indonesia president Widodo chuan, "Football vanga he rama chhiatna a thlen tawpna ni rawh se," a ti - khawvelin a hre reng tawh ang.

Football chhiatna rapthlak
May 24, 1964
Kum 1964 khan Lima-ah Peru leh Argentina ten Olympic qualifier an khel a, mipui innek buainaah mi 320 zet an thi a, mi 1000 an inhliam bawk.

October 20, 1982
UEFA Cup-ah Spartak Moscow leh Haarlem te Luzniki Stadium-ah an inkhel a, tun thlengin thi zat chungchang hi rinhlelh a la ni reng. Official chuan mi 66 an thi a, mi 45 chu rawlthar tih a ni. Amaherawhchu tualchhung chanchinbu Sovietski Sport chuan mi 340 thi angin an ziak.
May 9, 2001
Ghana khawpui Accra-ah Hearts of Oaks leh Kumasi te an inkhel a, inkhelh banah chak lo vanga thinrim Kumasi ten buaina an siam. Mi 126 an thi.

April 15, 1989
Sheffield Wednesday khelmual Hills-borough Stadium-ah Liverpool leh Nottingham Forest ten FA Cup semifinal an khel a, Liverpool fan 97 an thi.

May 11, 1985
Bradford leh Lincoln City inkhelh ṭumin enna thinga siam chu a kang a, mi 56 an thi.
October 16, 1996
1998 World Cup qualifier-ah Guatemala leh Costa Rica te an inkhel a, mipui inhnek buai vangin inkhel entu 80 bawr vel an thi.

January 2, 1971
Ibrox Stadium-ah Rangers leh Celtic te an inkhel a, enna chim vangin mi 66 an thi. Kum 1902 khan enna chim vangin mi 26 an thi tawh bawk.

February 1, 2012
Port Said Stadium-ah Al-Masry leh Al-Ahly te an inkhel a, inkhelh bana buaina a chhuah avangin mi 74 an thi.