Liverpool an tawlhthlu leh ta!

"He hun harsa hi kan paltlang a ngai. Kha aia ṭha zawk khan khel thei kan ni - kan tih ṭhat chhunzawm a, nghet taka ding chung a, defending ṭha tak kan mamawh a ni," tih chu Jurgen Klopp-a thusawi a ni a, Liverpool boss a mangang ṭan.

Inrinni zan khan Liverpool chuan Anfield-ah team narana ngaih Brighton & Hove Albion an mikhual a, hnehna chang ngei tura ngaih an nih laiin 3-3 in an inhnehtawk - Reds hian goal hnih an chhuah hmasa hial a, tun season Premier League match sarih aṭangin match ngaah goal an chhuah hmasa!

Brighton tan Leandro Trossard chuan hattrick a siam a, Reds tan Roberto Firmino chuan goal hnih khungin, Adam Webster (own goal) chuan khungpui bawk mah se, goal dang an neih miau loh avangin point khatah lungawi a ṭul - insiamṭhat an mamawh takzet.

Barakhaih

Anfield-a inkhel an ni a, Reds-in chak ngei an inring - mahse, Liverpool fan-te rinna leh beiseina chu phehsak an ni hma hle. Minute lina lekah Brighton player-ten Liverpool tlarhnung an ṭhiat a, Trossard chuan goal hmahruai a khung.

Brighton leh Trossard ten insum an tum lo - minute 17-naah tun hnaia sawisel tawk nasa Trent Alexander-Arnold

a chesual a, a ball hloh aṭanga kal zel chu Solly March chuan Trossard tan bawk a siamsak a, Belgian forward hian a hun ṭha neih hi a khawhral lo.

Goal hnih an chhuah hnuah Liverpool an insiamṭha a, Reds tak tak kan hmu leh ṭan. Minute 33-naah uai thlak lam pan tawh anga sawi Roberto Firmino chuan a kum a la tam lo tih a pholang a, si phurh a sut ṭhen.

Beiseina thamral

Liverpool-in goal an khung hnuah an phur sawt a, second half pawh an ṭan ṭha - bench aṭanga luhtir Luis Diaz a tal hiar a, Brighton tan hnawksak a tling. Colombian forward hian minute 54-naah Firmino khung tur a siamsak a, Brazilian forward hian ṭha taka ball lalutin si phurh a sut zo.

Reds an phur tawlh tawlh a, fans puihna an dawng ṭha bawk. Minute 63-naah Arnold-a corner aṭanga ball kal chu Brighton keeper Robert Sanchez chuan hnek chhuah tum mah se a hnek ṭhelh a, hei hian Adam Webster perin an lamah a lut daih!

Liverpool hi an chak ngei a rinawm tawh a, fan-te pawh an thla a muang. Mahse, goal hnih khungtu Trossard-a'n ngaihdan dang a nei - minuite 83-naah ṭha zetin a khung leh a, hattrick siamin Brighton chu point a hlawhchhuahpui a, coach thar Roberto De Zerbi hnuaia an match hmasa berah lawm tak chungin khelmual an chhuahsan.