PSG chakna Messi leh Mbappe

Lionel Messi-a'n freekick mawi zetin a chhuih lut a, mahse chak nan a tawk zo lo. Substitute Kylian Mbappe chuan hun tawp dawnah goal khungin Paris St-Germain chu Nice lakah 2-1 in hnehna a chanpui.

Inrinni zan Paris khawpuia Ligue 1 inkhelah Messi hian yard 20-a hla aṭangin freekick a pet lut a, a duhna lai kilah tak a dah avangin keeper Kasper Schmeichel tan dan ngaihna a awm lo, ui takin a en liam ringawt.

Nice lamin second half tirah Gaetan Laborde hmangin siphurh a sut, a club tana a goal hmasa ber hi point hmuh nan pawh a tawk hman teuh hle. Mahse, bench aṭanga lut Mbappe chuan hnai tak aṭangin Nordi Mukiele siamsak a khung.

Season hmasa nena chhiar zawmin PSG hi an league match hnuhnung 18-ah an tlawm lo, tun season bikah match kua aṭanga point 25 hmuin table chung berah an awm, pahnihna Marseille aiin point hnihin an sang zawk.

PSG coach Christophe Galtier chuan, "Ram tana feh chhuak player an tam a, inbuatsaih lehna hun a tlem avangin inkhelh a harsa deuh. Leo nen kan inbia a, inkhel tura inpeih avangin a khel," tiin a sawi.

Messi hi Argentina tan a feh chhuak - America ram inkhel a nih avangin a zinna a hla tham bik. Ligue 1 bakah Champions League khelh zui tur an nei, kum 35 mi forward hi hun tawp dawnah lak chhuah niin PSG fans-ten zahna lantir nan ding chungin kut bengin chibai an buk.