Lewandowski tana tual chaina nuam La Liga!

Robert Lewandowski-a'n Spanish football-a a season hmasa berah inthlahrun a tum lo - Real Mallorca lakah goal a khung leh ta a, Barcelona chu 1-0 in hnehna a chanpui.

Lewy hian tun season-ah Barca tan match kua khelin goal 12 a khung leh der tawh a, kum 34 mi ni tawh mah se Catalan club tan danglamna thlentu a la ni zel.

Inrinni zan La Liga inkhel ngaihven hlawh dangah Atletico Madrid chuan 2-0 in Sevilla an hneh a, Marcos Llorente leh Alvaro Morata ten goal khat ve ve an khung.

Barca an chak
Mallorca khelmualah Lewandowski-a'n goal khung turin hun a nghah rei a ngai lo - minute 20-na lekah a class pholangin, ṭha zetin goal hmahruai a khung a, league match sariha goal kua a khungna chiah a ni.

Mualneitu Mallorca-in si phurh sutna chance an nei a, mahse, Jaume Costa khung ngei tura lang chu goalkeeper Marc-Andre ter Stegen chuan ṭha zetin a dansak a, German keeper hian Antonio Sanchez leh Lee Kang-in khung tur a dansak bawk.

Barca tana goal khungtu chu Lewy a ni a, si ban kara Ter Stegen chet dan enin, Barca chakpuitu erawh German keeper tih ngam a ni - Catalan club hian league match sarihah tlawm nei loin table chung ber an luah a, nizana Real Madrid result a zirin danglam leh thei erawh a ni.

Atletico tan beiseina
Diego Simeone enkawl Atletico Madrid an insiamṭha ve leh ta a, Madrid derby-a an tlawm hnuah Sevilla chu 2-0 in an hneh - table chung lamah an invawrh chho ve leh ta.

Atletico tan Marcos Llorente chuan minute 29-naah goal hmahruai a khung a, Alvaro Morata chuan rintlak a la ni reng tih pholangion, second half-ah an goal hnihna a khung ve leh bawk.

Simeone-a naute an insiamṭha a, Julen Lopetegui enkawl Sevilla erawh an insiamṭha thei lo - league match sariha vawi li an tlawmna a ni ta a, vawi khat chiah an la chak avangin table-ah 16-na an ni mek.

September 30, Zirtawpni Zan
Athletic Bilbao 4 - 0 Almeria
ATB: Iñaki Williams 10'; Oihan Sancet 17'; Nico Williams 62'; Mikel Vesga 84' (P)

October 1, Inrinni Zan
Cadiz 0 - 0 Villarreal

Getafe 2 - 3 Real Valladolid
GET: Borja Mayoral 29'; Damián Suárez 31'
REV: Sergio León 20' (P), 37'; Óscar Plano 48'

Sevilla 0 - 2 Atletico Madrid
ATM: Marcos Llorente 29'; Álvaro Morata 57'

Real Mallorca 0 - 1 Barcelona
BAR: Robert Lewandowski 20'

Nizan Inkhel (Result kan hre hman lo)
Espanyol 05:30 PM Valencia
Celta Vigo 07:45 PM Real Betis
Girona 10:00 PM Real Sociedad
Real Madrid 12:30 AM Osasuna

Team Dinhmun