Bellingham a captain, Dortmund an chak lo

Borussia Dortmund-in Inrinni zan khan FC Cologne an tlawh a, English rawlthar duhawm Jude Bellingham chuan a vawi khat nan Dortmund captain hna a chelh. Kum 19 mi Bellingham tan zan pawimawh bik ni mah se Dortmund an chak zo lo a, Cologne lakah 3-2 in an tlawm.

Dortmund-in bul an ṭan ṭha a, chance pawh a hlah hnem. Minute 31-naah Julian Brandt-a'n goal hmahruai a khung a, goal an khung hnuah a che ṭha zui lo. Cologne-in second half-ah Florian Kainz leh Steffen Tigges te hmangin an chhanglet a, Dejan Ljubicic-a'n mualneitu tan goal thumna a khung leh bawk.

Minute 78-naah Cologne player Benno Schmitz-a'n an lamah a tilut a, hun tawp lam inkhel a nun phah hle. Dortmund captain Marco Reus chu hliam vangin a khel thei lo a, damloh vanga Mats Hummels-a'n a inlan theih loh bawk avangin Bellingham hian captain armband hi a hren phah a ni.

Inkhel dangah champion lai Bayern Munich an insiam ṭha a, Bayer Leverkusen 4-0 in an sawp. Bavarians tan hian Leroy Sane, Jamal Musiala, Sadio Mane leh Thomas Muller ten goal khat ṭheuh an khung.

League hmahruaitu Union Berlin pawhin Eintracht Frankfurt 2-0 in an hneh lo a, Frankfurt tan hian Mario Gotze leh Jesper Lindstrom ten goal khat ve ve an khung. Union Berlin hian SC Freiburg nen point 17 hmuin hma hruai chhunzawm mah se Bayern laka hma an hruaina chu point hnih chauh a ni tawh - Julian Nagelsmann-a hote hi champion nawn leh tura rinkai an ni.

Bundesliga

September 30, Zirtawpni
Bayern Munich 4 - 0 Bayer Leverkusen

October 1, Inrinni
RB Leipzig 4 - 0 Bochum
Freiburg 2 - 1 Mainz
FC Cologne 3 - 2 Borussia Dortmund
Eintracht Frankfurt 2 - 0 Union Berlin
Wolfsburg 3 - 2 Stuttgart
Werder Bremen 5 - 1 Borussia M'gladbach